ДЗЯРЖОРГАНЫДЗЯРЖОРГАНЫ
Чацвер, 3 снежня 2020
Мінск Суцэльная воблачнасць -2°C
Усе навіны
Усе навіны
Культура
21 кастрычніка 2020, 17:38

Галоўчанка: людзей мастацтва нельга ставіць у рамкі, але выхоўваць характар трэба

Наталля Карчэўская і Раман Галоўчанка
Наталля Карчэўская і Раман Галоўчанка

21 кастрычніка, Мінск /Кар. БЕЛТА/. Людзей мастацтва нельга ставіць у рамкі, але выхоўваць іх характар трэба. Такое меркаванне выказаў прэм'ер-міністр Раман Галоўчанка сёння, прадстаўляючы новага рэктара Беларускага дзяржаўнага ўніверсітэта культуры і мастацтваў (БДУКМ) Наталлю Карчэўскую, перадае карэспандэнт БЕЛТА.

Кіраўнік урада звярнуў увагу, што БДУКМ рыхтуе людзей, якія праз нейкі час павінны стаць "апорай беларускай культуры, зоркамі". "Што вы (выкладчыкі. - Заўвага БЕЛТА) у іх закладзяце, то яны будуць несці са сцэны ў масы. На мой погляд, у вас вельмі складаная работа. Творчыя людзі - вельмі асаблівыя, яны не будуць хадзіць строем, спяваць адны і тыя ж песні. Гэта людзі з асаблівай адчувальнасцю да працэсаў, якія адбываюцца", - адзначыў Раман Галоўчанка.

Паводле яго слоў, у перыяд нейкіх турбулентнасцей, вострых працэсаў людзі мастацтва, як правіла, найбольш актыўна выказваюць сваю пазіцыю. "Але ўсё ж такі характар артыстаў трэба выхоўваць, нельга пускаць усё на самацёк. Маё глыбокае перакананне - нельга ставіць людзей мастацтва ў нейкія рамкі, мы гэта праходзілі ўжо ў СССР", - заявіў Раман Галоўчанка.

Прэм'ер-міністр запэўніў, што ўлады ніколі не пойдуць на тое, каб падвяргаць нешта цэнзуры. "Таму што забраць у творчага чалавека свабоду самавыяўлення - значыць, фігуральна кажучы, наступіць яму на горла. Але гэта не выключае выхавання характару, закладання асноў патрыятызму і, самае галоўнае, крытычнага асэнсавання таго, што ўкладвалася ў вушы маладому пакаленню", - сказаў ён.

Раман Галоўчанка адзначыў, што ў змене рэктара Беларускага дзяржаўнага ўніверсітэта культуры і мастацтваў няма ніякай надзвычайшчыны. "Гэта не нейкае змяненне курсу або хтосьці не справіўся. Так, былі пытанні, але мінулага рэктара ніхто не зняў", - сказаў ён і растлумачыў, што рашэнне аб змене рэктара БДУКМ было прынята свядома, каб прыўнесці ў адукацыйны працэс нешта новае і змяніць падыходы да навучання.

Гаворачы пра новага рэктара, прэм'ер-міністр звярнуў увагу, што Наталля Карчэўская абсалютна не чужы для сферы культуры чалавек, вопыт работы ў Мінкульце і творчая натура павінны дапамагчы ёй выканаць пастаўленыя задачы.

Раман Галоўчанка лічыць, што без культуры беларусы могуць страціць сябе як народ, таму трэба захаваць і развіваць яе. На яго думку, на самаідэнтычнасці беларускага народа можна пабудаваць ідэалогію, на якой выхоўвалася маладое пакаленне. "Цяпер ідуць складаныя пошукі таго, чым можна было б захапіць моладзь. Напэўна, у тым, чым вы займаецеся, і трэба шукаць гэты стрыжань. Нам патрэбны адданыя людзі. Адданыя не асабіста некаму, а дзяржаве. Хто б ні кіраваў гэтай дзяржавай, яны павінны быць вернымі краіне, радзіме", - рэзюмаваў прэм'ер-міністр.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі