Законапраект "Аб змяненні законаў па пытаннях падаткаабкладання" знаходзіцца на фінішнай стадыі падрыхтоўкі да разгляду дэпутатамі ў першым чытанні. Да падрыхтоўкі дакумента прыцягваліся зацікаўленыя міністэрствы і ведамствы. Як чакаецца, ужо 7 снежня законапраект будзе прадстаўлены ў Авальнай зале. Что чакае падаткаплацельшчыкаў у 2023 годзе, карэспандэнту БЕЛТА расказала член Пастаяннай камісіі па бюджэце і фінансах Палаты прадстаўнікоў Святлана Барташ.
"30 лістапада ў Авальнай зале дэпутаты Палаты прадстаўнікоў і члены Савета Рэспублікі разгледзелі ў "нулявым" чытанні бюджэтны пакет законапраектаў на 2023 год, - нагадала Святлана Барташ. - Хацелася б спыніцца на найбольш значных асноўных змяненнях, уключаных у праект закона аб змяненні законаў па пытаннях падаткаабкладання. Адразу адзначу, што змяненні закрануць агульную і асаблівую часткі Падатковага кодэкса".
Адным з асноўных новаўвядзенняў 2023 года з'яўляецца абмежаванне пяццю гадамі правяраемага перыяду пры правядзенні камеральнай праверкі арганізацыі або індывідуальнага прадпрымальніка.
"Уводзяцца новыя аб'екты падаткаабкладання акцызамі - нафта сырая, падатак на ігральны бізнес (ігравы даход) з віртуальнай ігральнай установы з павелічэннем стаўкі з 4 да 8 працэнтаў. Прадугледжваецца індэксацыя падатковых ставак, устаноўленых у беларускіх рублях з мэтай адаптацыі да інфляцыйных працэсаў. Павышэнне акцызаў на паліва не плануецца, - адзначыла дэпутат. - Прадугледжваецца павелічэнне ставак акцызаў на алкагольную прадукцыю і тытунёвыя вырабы з улікам дасягнутых дамоўленасцей у рамках Дагавора аб агульных прынцыпах падаткаабкладання па ўскосных падатках паміж Рэспублікай Беларусь і Расійскай Федэрацыяй. Прапануецца ўключэнне з 2023 года ў пералік падакцызных тавараў электронных сістэм курэння, сістэм для спажывання тытуню з устанаўленнем на іх стаўкі акцызаў, якая адпавядае памеру, што прымяняецца ў Расіі для электронных сістэм дастаўкі нікаціну (Br2,72 за 1 штуку)".
Павялічваецца стаўка падатку на прыбытак з 18 да 20 працэнтаў. "Пры гэтым адначасова адмяняецца права абласных Саветаў дэпутатаў павялічваць агульнаўстаноўленую стаўку да 2 працэнтных пунктаў, - удакладніла Святлана Барташ. - Захавана падаткаабкладанне, выпрацаванае ў перыяд COVID-19. Гэта значыць прадаўжаецца дзеянне з 1 студзеня 2023 года да 1 студзеня 2025-га стаўкі падатку на прыбытак у памеры 30 працэнтаў для аператараў сотавай рухомай электрасувязі, аператара па абавязковым аказанні ўніверсальных паслуг электрасувязі і камерцыйных мікрафінансавых арганізацый, па падаходным падатку для Парка высокіх тэхналогій. Захавана права мясцовых Саветаў дэпутатаў уводзіць мясцовы збор за перасячэнне транспартнымі сродкамі граніцы".
Цяпер Падатковы кодэкс змяшчае нормы, якія ўступаюць у сілу з 1 студзеня 2023 года. "З мэтай скарачэння незавершанага будаўніцтва з 2023 года будуць прымяняцца стаўкі зямельнага падатку, павялічаныя на каэфіцыент 3 на зямельныя ўчасткі, прадастаўленыя арганізацыям для будаўніцтва або абслугоўвання капітальных будынкаў і збудаванняў, на якіх на працягу трох гадоў з даты прадастаўлення такіх участкаў не праведзена дзяржаўная рэгістрацыя стварэння капітальных будынкаў, уключаючы апошні з узводзімых аб'ектаў. Спрашчаецца адміністраванне зямельнага падатку для арганізацый. Плануецца ўкараненне з 2023 года сістэмы прафайлінгу. Цяпер сам падатковы орган на падставе існуючых у іх звестак робіць папярэдні разлік праекта падатковай дэкларацыі за мінулы год і накіроўвае яе плацельшчыкам-арганізацыям для падпісання. Гэты праект арганізацыя-плацельшчык мае права пры неабходнасці карэкціраваць. Таксама ў мэтах раўнамернага паступлення зямельнага падатку ў бюджэт на працягу справаздачнага года ўстанаўліваецца абавязак выплаты арганізацыямі авансавых плацяжоў па зямельным падатку па чатырох тэрмінах у аднолькавай суме. Канчатковы разлік па зямельным падатку будзе праводзіцца па выніках каляндарнага года", - дадала парламентарый.
"Прадаўжаецца ўдасканаленне падатковага заканадаўства індывідуальных прадпрымальнікаў. Абмяжоўваюцца віды дзейнасці, пры якіх магчыма выплата адзінага падатку з індывідуальных прадпрымальнікаў і іншых фізічных асоб, з адначасовым павелічэннем ставак гэтага падатку ад 1,5 да 3 разоў. Напрыклад: застаюцца працаваць ІП, якія ажыццяўляюць рамонт прадметаў асабістага карыстання і бытавых вырабаў. Прыклад, працуючыя ў гарадах абласнога падпарадкавання будуць выплачваць падатак Br424 у месяц. Застануцца працаваць ІП, якія ажыццяўляюць рознічны гандаль па асобных групах тавараў: хлеб і хлебабулачныя вырабы, малако і малочная прадукцыя, агародніна, плады, ягады і да таго падобнае, - падкрэсліла Святлана Барташ. - На 2023 год захавана права абласным Саветам дэпутатаў змяншаць альбо павялічваць не больш як у 2 разы (Мінскім гарадскім Саветам дэпутатаў - у 4 разы) стаўкі адзінага падатку ў залежнасці ад населенага пункта, месца ажыццяўлення дзейнасці і катэгорыі плацельшчыкаў.
Прапануецца захаваць на наступны год дзеючы парадак выплаты індывідуальнымі прадпрымальнікамі падаходнага падатку з фізічных асоб з даходаў, атрыманых ад прадпрымальніцкай дзейнасці, з адначасовым павелічэннем стаўкі гэтага падатку з 16 да 20 працэнтаў. Для фізічных асоб, якія не ажыццяўляюць прадпрымальніцкую дзейнасць, прапанавана павялічыць стаўкі адзінага падатку да 2 разоў".
Удасканальваецца парадак правядзення камеральных праверак адпаведнасці расходаў даходам фізічных асоб, у тым ліку ў частцы ўзмацнення меры ўздзеяння пры іх правядзенні ў адносінах да доўга непрацуючых грамадзян. "У прыватнасці, у адносінах да грамадзян, незанятых у эканоміцы больш за пяць гадоў, прапанавана пры правядзенні кантролю за адпаведнасцю расходаў даходам не прымаць у якасці крыніц даходаў, накіраваных на набыццё маёмасці і іншыя мэты, даходаў, атрыманых ад іншых фізічных асоб па дагаворах пазыкі, дарэння, захоўвання (за выключэннем такіх даходаў, атрыманых ад асоб, якія знаходзяцца ў адносінах блізкай роднасці або сваяцтва). Прапануецца вылічваць падаходны падатак у памеры 10 працэнтаў з даходаў у выглядзе пазык, дарэння, захоўвання, атрыманых ад асоб, якія знаходзяцца ў адносінах блізкай роднасці або сваяцтва. У такім выпадку падатак вылічваецца з сум, атрыманых на працягу года вышэйназваных даходаў, якія перавысілі парогавае значэнне. У дачыненні да сум перавышэнняў расходаў над даходамі, устаноўленых па выніках праверкі, прапануецца павысіць стаўку падаходнага падатку да 26 працэнтаў", - дадала дэпутат.
Акрамя таго, прапануецца павялічыць памер стаўкі падаходнага падатку з 20 да 26 працэнтаў пры ўстанаўленні кантралюючымі органамі фактаў выплаты заработнай платы ў канвертах, а таксама афармлення фіктыўных выйгрышаў пры вывадзе грашовых сродкаў у інтарэсах арганізатараў азартных гульняў або іншых асоб, а таксама адносна даходаў, што атрымліваюцца фізічнымі асобамі, якія ажыццяўляюць прадпрымальніцкую дзейнасць без дзяржаўнай рэгістрацыі, а таксама іншую дзейнасць, калі такая дзейнасць у адпаведнасці з заканадаўчымі актамі з'яўляецца незаконнай або забараняецца.
Як было анансавана, бюджэтны пакет законапраектаў на 2023 год дэпутаты плануюць прыняць у двух чытаннях да канца года.
Святлана СУХАРКО,
БЕЛТА.-0-
