Штогод у конкурсны рух прафесійнага майстэрства ўключаюцца навучэнцы, студэнты і маладыя рабочыя. Гэта дазваляе павысіць прывабнасць сістэмы прафадукацыі, абнаўляць змест адукацыі і забяспечваць яе якасць, фарміраваць кампетэнцыі, якія адпавядаюць патрабаванням рынку працы. Навучэнцы і студэнты ўсіх рэгіёнаў Беларусі ўдзельнічаюць у конкурсным руху прафмайстэрства на розных узроўнях. На міжнародным узроўні актыўна ідзе супрацоўніцтва з рэгіёнамі Расіі, Кітаем, краінамі Азіяцка-Ціхаакіянскага рэгіёна, Садружнасці Незалежных Дзяржаў. Аб развіцці конкурсаў прафесійнага майтэрства, перамогах і планах карэспандэнту БЕЛТА расказаў рэктар Рэспубліканскага інстытута прафесійнай адукацыі Валерый Галубоўскі.
"Конкурсы прафесійнага майстэрства накіраваны на фарміраванне інавацыйна-творчага прафесіяналізму навучэнцаў і студэнтаў, стварэнне ўмоў для станаўлення і развіцця моладзі як прафесіяналаў і патрыётаў, адказных за будучыню сваёй краіны. На працягу 2021/2022 навучальнага года Рэспубліканскі інстытут прафесійнай адукацыі сумесна з галоўнымі ўпраўленнямі па адукацыі аблвыканкамаў, Камітэтам па адукацыі Мінгарвыканкама праводзіць конкурсы прафмайстэрства на ўзроўні ўстаноў прафесійнай адукацыі па асобных кампетэнцыях, на ўзроўні абласцей і горада Мінска - па групе кампетэнцый у рамках адборачных тураў рэспубліканскага конкурсу прафесійнага майстэрства. Пераможцы адборачных тураў будуць прадстаўляць свой рэгіён на рэспубліканскім конкурсе ў 2023 годзе", - расказаў Валерый Галубоўскі.
Адным з апошніх маштабных мерапрыемстваў стаў II Міжнародны конкурс "Майстры Шаўковага шляху - 2022", які прайшоў у Пекіне з 30 мая па 3 чэрвеня. На ім каманда Беларусі была прадстаўлена ў пяці кампетэнцыях: "Поварская справа", "Барыста", "Кандытарская справа", "Дашкольная адукацыя (выхавальнік дзяцей дашкольнага ўзросту, настаўнік пачатковых класаў)" і "Графічны дызайн". Спаборніцтвы праходзілі ў анлайн-рэжыме з-за эпідэміялагічнай сітуацыі ў Кітаі. Пры гэтым пляцоўкі былі абсталяваны па міжнародных стандартах, працэс выканання заданняў дэманстраваўся ў рэжыме рэальнага часу, а ацэнку праводзілі эксперты краін - удзельніц конкурсу, дыстанцыйна назіраючы за выкананнем усіх патрабаванняў. Вынікі конкурсу будуць аб'яўлены ў канцы чэрвеня.
У Хабараўскім краі з 14 сакавіка па 1 красавіка 2022 года праходзіў марафон лепшых практык з удзелам краін Азіяцка-Ціхаакіянскага рэгіёна (АЦР) і Садружнасці Незалежных Дзяржаў (СНД). Удзел у ім прымалі 68 канкурсантаў і 84 эксперты. Спаборніцтвы праходзілі ў вочна-дыстанцыйным фармаце з выкарыстаннем платформы Zoom.
Беларусь прадстаўлялі пераможцы IV Рэспубліканскага конкурсу прафесійнага мастацтва і дэбютанты конкурснага руху. Яны спаборнічалі па шасці кампетэнцыях. У тройку прызёраў сярод удзельнікаў краін АЦР і СНД па кампетэнцыі "Распрацоўка мабільных дадаткаў" увайшоў студэнт БДУІР Елісей Будніцкі. Другое месца ў кампетэнцыі "Праграмныя рашэнні для бізнесу" заняў студэнт Інстытута пагранічнай службы Беларусі Максім Мемус. Трэцяе месца ў кампетэнцыі "Інжынерны дызайн CAD" - у студэнта БНТУ Дзмітрыя Дораха. Экспертамі з беларускага боку выступілі прадстаўнікі каледжаў і прафесарска-выкладчыцкага складу ўстаноў вышэйшай адукацыі.
Што датычыцца мясцовага ўзроўню, то найбольш маштабныя конкурсы ў гэтым навучальным годзе праведзены ў Брэсцкай, Віцебскай, Гомельскай і Мінскай абласцях. Акрамя таго, прайшлі конкурсы прафмайстэрства з прыцягненнем вучняў у рамках галіновых чэмпіянатаў. Напрыклад, у конкурсе прафесійнага майстэрства сярод работнікаў холдынга "Амкадор" пастаянна ўдзельнічаюць навучэнцы каледжаў Мінска.
"У Брэсцкай вобласці праведзены абласныя конкурсы прафесійнага майстэрства сярод навучэнцаў устаноў прафесійна-тэхнічнай і сярэдняй спецыяльнай адукацыі па прафесіі "прадавец", "электраманцёр па рамонце і абслугоўванні электраабсталявання", "повар", "токар", "фрэзероўшчык" і "вадзіцель аўтамабіля". Прайшоў абласны конкурс прафмайстэрства навучэнцаў і майстроў вытворчага навучання па спецыяльнасці "тэхналогія зварачных работ". У канцы мая адбыўся абласны фестываль-конкурс прафмайстэрства па міжнародных стандартах сярод навучэнцаў, студэнтаў і маладых рабочых з 46 устаноў адукацыі па 44 кампетэнцыях, па 14 з іх - для людзей з асаблівасцямі псіхафізічнага развіцця", - дадаў рэктар.
Акрамя таго, у Брэсцкай вобласці восенню 2022 года запланаваны абласны адкрыты конкурс прафесійнага майстэрства "Аграмайстэрства", а таксама турнір па робататэхніцы "РобаФэст".
"У Віцебскай вобласці ўжо прайшлі абласныя конкурсы сярод навучэнцаў устаноў прафесійна-тэхнічнай і сярэдняй спецыяльнай адукацыі па кампетэнцыях "Тэхналогія моды", "Электрамантаж", сярод навучэнцаў устаноў сярэдняй спецыяльнай адукацыі - па кампетэнцыі "Аграномія". У планах на пачатак восені - спаборніцтвы па кампетэнцыі "Эксплуатацыя сельскагаспадарчых машын".
У Гомельскай вобласці праведзены аналагічныя конкурсы па кампетэнцыях "Пачатковая адукацыя", "Сантэхніка і ацяпленне", "Эксплуатацыя сельскагаспадарчых машын", "Абліцоўшчык-плітачнік", "Цагляны мур", "Майстэрства цырульніка", "Тэхналогія моды", "Зварачныя работы". У верасні - снежні 2022 года пройдуць абласныя конкурсы па кампетэнцыях "Дашкольная адукацыя", "Аграномія", "Электрамантажныя работы", "Маляр", "Музычная адукацыя", "Цясляр", "Сталяр", "Праграмнае рашэнне для бізнесу", "Кулінарнае майстэрства", "Хлебапячэнне", "Вэб-дызайн і распрацоўка".
У Мінскай вобласці выбіралі лепшых у кампетэнцыях "Малярныя і дэкаратыўныя рыботы", "Кулінарнае майстэрства", "Зварачныя тэхналогіі", "Абліцоўка пліткай", "Электрамантаж", "Тэхналогія моды" і "Цагляны мур".
У Мінскім дзяржаўным прафесійна-тэхнічным каледжы лёгкай прамысловасці і бытавога абслугоўвання насельніцтва 2 чэрвеня прайшоў адкрыты конкурс прафесійнага майстэрства па спецыяльнасцях "майстэрства цырульніка і дэкаратыўная касметыка" і "фатаграфія". У ім прынялі ўдзел больш за 150 навучэнцаў устаноў адукацыі Беларусі, што забяспечваюць падрыхтоўку кадраў для індустрыі прыгажосці.
"Мы імкнёмся да далейшага развіцця конкурснага руху. Сумесна з Дэпартаментам дзяржаўнай палітыкі ў сферы сярэдняй прафесійнай адукацыі Мінасветы Расіі, аўтаномнай некамерцыйнай арганізацыяй "Агенцтва развіцця прафесійнага майстэрства (Ворлдскілс Расія)" у нас запланавана правядзенне Размеркаванага еўразійскага чэмпіянату паміж нацыянальнымі камандамі краін еўразійскага рэгіёна. Ён пройдзе ў верасні 2022 года ў Саранску і Маскве, у кастрычніку - у Екацярынбургу, у лістападзе-снежні - у Санкт-Пецярбургу. На нацыянальным узроўні ў адпаведнасці з рашэннем рэспубліканскага арганізацыйнага камітэта WorldSkills International у Беларусі запланавана правядзенне ў 2023 годзе V Рэспубліканскага конкурсу прафесійнага майстэрства па міжнародных і нацыянальных стандартах", - сказаў на заканчэнне Валерый Галубоўскі.
БЕЛТА.
