Кітай у 2021-2025 гадах будзе рэалізоўваць новы пяцігадовы план нацыянальнага эканамічнага і сацыяльнага развіцця. Аб асаблівасцях гэтай перспектыўнай праграмы развіцця краіны расказаў карэспандэнту БЕЛТА Надзвычайны і Паўнамоцны Пасол КНР у Беларусі Цуй Цымін.
Кіраўнік дыпмісіі адзначыў, што гэта будзе 14-ы па ліку за час існавання КНР пяцігадовы план нацыянальнага эканамічнага і сацыяльнага развіцця.
"Перыяд новай пяцігодкі, якая стартуе ў 2021 годзе, стане пачаткам новага шляху пабудовы сучаснай сацыялістычнай дзяржавы - пасля ўсебаковай пабудовы Кітаем сярэднезаможнага грамадства. Краіна ўступіць у новы этап развіцця. Некалькі дзён таму старшыня КНР Сі Цзіньпін даў важныя растлумачэнні адносна сацыяльна-эканамічнага развіцця ў 14-й пяцігодцы", - падкрэсліў пасол.
"У прыватнасці, Кітай будзе разглядаць новыя магчымасці і выклікі на новым этапе развіцця з дапамогай дыялектычнага мыслення, - звярнуў увагу Цуй Цымін. - Сённяшні свет перажывае небывалыя за стагоддзі перамены. Пандэмія каранавіруса новага тыпу паскорыла гэтыя змены. Пратэкцыянізм, унілатэралізм набіраюць вышыню, а сусветная эканоміка перажывае спад, глабальны вытворчы ланцужок і ланцужок паставак сутыкаюцца з уздзеяннем неэканамічных фактараў".
Пасол канстатаваў, што міжнародныя эканоміка, навука, тэхніка, культура, бяспека і палітыка перажываюць глыбокія змяненні, сусвет уступіў у перыяд бурных змяненняў. Пры гэтым унутранае развіццё КНР таксама перажывае змяненні.
Паводле слоў дыпламата, Кітай уступіў у этап высакаякаснага развіцця. Галоўная сацыяльная супярэчнасць трансфармавалася ў супярэчнасць паміж узрастаючай патрэбнасцю людзей у лепшым жыцці і нераўнамерным, недастатковым развіццём. "Глыбокія змяненні ва ўнутраным і знешнім асяроддзі Кітая прынеслі як шэраг новых магчымасцей, так і шэраг новых выклікаў. Магчымасці і выклікі спадарожнічаюць адзін аднаму, у выкліках ёсць магчымасці, выклікі можна ператварыць у магчымасці", - заўважыў ён.
"КНР будзе пашыраць фарміраванне новай мадэлі развіцця з унутраным цыклам у якасці прыярытэту. У гэтай мадэлі ўнутраны і міжнародны цыклы развіцця будуць садзейнічаць адзін аднаму. Мы маем намер прытрымлівацца стратэгічнай структурнай рэформы з улікам унутранага прапанавання, таму вытворчасць, размеркаванне, абарачэнне і спажыванне будуць больш залежаць ад унутранага рынку, - растлумачыў Цуй Цымін. - Новая мадэль развіцця - гэта не замкнуты ўнутраны цыкл, а адкрыты ўнутраны і знешні цыклы. Становішча Кітая ў сусветнай эканоміцы будзе прадаўжаць расці, а яго сувязь з сусветнай эканомікай стане яшчэ больш цеснай, што адкрые больш шырокія магчымасці для іншых краін і стане вялікім гравітацыйным полем для прыцягнення міжнародных тавараў і рэсурсаў".
Акрамя таго, Кітай мае намер выкарыстоўваць тэхналагічныя інавацыі для стварэння новага імпульсу развіцця. "Краіна будзе прыкладаць намаганні да павышэння ўласнага інавацыйнага патэнцыялу ў мэтах хутчэйшага прарыву ў ключавых тэхналогіях. Пры гэтым наша краіна разлічвае ў поўнай меры выкарыстоўваць несумненныя перавагі сацыялістычнай сістэмы, у тым ліку сканцэнтраваць намаганні для ажыццяўлення вялікіх пачынанняў у гэтым напрамку", - заўважыў дыпламат. Кітай будзе прытрымлівацца адкрытасці ў інавацыях, а таксама будзе ўмацоўваць навукова-тэхнічнае супрацоўніцтва і абмены.
"КНР будзе стымуляваць новае развіццё яшчэ большым паглыбленнем рэформ. Рэформы - гэта ключ да развіцця прадукцыйных сіл, фундаментальная рухаючая сіла развіцця краіны, - лічыць дыпламат. - Рэформы ў нас праводзяцца ўжо больш як 40 гадоў і з'яўляюцца вялікім дасягненнем, прызнаным ва ўсім свеце. Па меры таго як наша краіна ўступае ў новы этап развіцця, рэформы таксама сутыкаюцца з новымі задачамі".
Цуй Цымін сказаў аб тым, што ў КНР будзе ўдасканальвацца сацыялізм з кітайскай спецыфікай, прадоўжыцца мадэрнізацыя сістэмы дзяржаўнага кіравання. "Мы разлічваем удасканальваць сацыялістычную эканамічную сістэму з разлікам на тое, каб рынак мог мець галоўную ролю ў размеркаванні рэсурсаў, яшчэ больш эфектыўна выкарыстоўваць магчымасці ўрада і ствараць доўгатэрміновае, стабільнае і прадказальнае сістэмнае асяроддзе. Напрыклад, Кітай умацуе абарону правоў уласнасці і правоў інтэлектуальнай уласнасці, пабудуе рыначную сістэму з высокімі стандартамі, палепшыць сістэму сумленнай канкурэнцыі, будзе стымуляваць жыццяздольнасць удзельнікаў рынку і дасць магчымасць у поўнай меры выкарыстоўваць усе крыніцы, якія садзейнічаюць развіццю прадукцыйных сіл грамадства", - дадаў ён.
Акрамя таго, Кітай нацэлены на стварэнне новых пераваг у міжнародным супрацоўніцтве і канкурэнцыі. "Цяпер міжнародная супольнасць вельмі занепакоена перспектывамі эканамічнай глабалізацыі, - звярнуў увагу пасол. - Кітай лічыць, што міжнароднае эканамічнае ўзаемадзеянне і абмены па-ранейшаму з'яўляюцца аб'ектыўнымі патрабаваннямі для сусветнага эканамічнага развіцця. Адкрытасць знешняму свету - асноўная дзяржаўная палітыка краіны. КНР усебакова павысіць узровень адкрытасці, пабудуе новую адкрытую эканамічную сістэму больш высокага ўзроўню і сфарміруе новыя перавагі ў міжнародным супрацоўніцтве і канкурэнцыі".
Таксама краіна будзе актыўна ўдзельнічаць у рэформе сістэмы глабальнага эканамічнага кіравання, пашыраць больш справядлівую і разумную сістэму міжнароднага эканамічнага кіравання. Дзяржава гатова да актыўнага супрацоўніцтва з усімі краінамі, рэгіёнамі і прадпрыемствамі, а таксама фарміравання шматузроўневай дыверсіфікацыйнай мадэлі адкрытага ўзаемадзеяння. "Сярод важных партнёраў для супрацоўніцтва КНР разглядае і Беларусь", - сказаў дыпламат.
Ён адзначыў, што Кітай пашырыць сумеснае з іншымі краінамі міжнароднае будаўніцтва, кіраванне і выкарыстанне. "Інтэрнэт змяніў спосаб узаемадзеяння людзей, а сацыяльныя канцэпцыі, сацыяльная псіхалогія і паводзіны зведалі глыбокія змяненні, - канстатаваў пасол. - Наша краіна будзе рэалізоўваць гарманічнае ўзаемадзеянне паміж дзяржаўным кіраваннем з сацыяльным рэгуляваннем і аўтаноміяй насельніцтва. Таксама мы пабудуем супольнасць сацыяльнага кіравання, у якой кожны нясе адказнасць, выконвае свой абавязак і валодае правам выкарыстання. У КНР будзе ўдзяляцца больш увагі падтрыманню сацыяльнай справядлівасці, а таксама ўсебаковаму развіццю людзей і грамадства".
Цуй Цымін падкрэсліў, што Кітай мае намер і ў далейшым настойліва развіваць эканамічную глабалізацыю, узаемадзейнічаць з іншымі краінамі свету, у тым ліку Беларуссю, для абмеркавання агульных праблем, з якімі сутыкаецца чалавецтва, і ўносіць кітайскую мудрасць у пабудову супольнасці адзінага лёсу чалавецтва.
Аліна ГРЫШКЕВІЧ,
БЕЛТА.
