"Камунарка" запускае праект па будаўніцтве яшчэ адной фабрыкі. Гэта будзе прадпрыемства па першаснай перапрацоўцы какававых зярнят, з укараненнем новых ліній і стварэннем гатовага прадукту. Кампанія выйдзе на рынак не толькі як прадпрыемства па вытворчасці і продажы кандытарскіх вырабаў, але і паўфабрыкатаў. Інакш кажучы, пойдзе ў В2В-сектар, будзе гандляваць з аналагічнымі кандытарскімі кампаніямі, прадаючы ім ужо сыравінны складнік. Праект даволі маштабны з пункту гледжання і фінансавання, і будаўніцтва, і закупкі абсталявання. Больш падрабязна аб праекце, а таксама аб рэзультатах прадпрыемства ў бягучым годзе расказалі ў СААТ "Камунарка", паведамляе карэспандэнт БЕЛТА.
Новая вытворчасць
Агульная плошча праектуемай тэрыторыі інавацыйнай імпартазамяшчальнай вытворчасці поўнага цыкла складае 11,65 га і размяшчаецца ў Заводскім раёне па вуліцы Герасіменкі. Першая стадыя ўводу праекта запланавана на 2026 год, другая - на 2029-ы.
"Прадугледжаны тры крыніцы фінансавання - Інавацыйны фонд Мінска, Банк развіцця і ўласныя сродкі. Тэрмін акупнасці праекта - каля 7,5 гадоў. "Камунарка" стане галінаўтваральным прадпрыемствам і зможа замясціць імпарт паўфабрыкатаў у Беларусь у аб'ёме 11 тыс. т. Акрамя таго, мы зможам значна павялічыць свой экспартны патэнцыял. Вялікія перспектывы ёсць на расійскім рынку, на рынку Сярэдняй Азіі - Узбекістан, Казахстан і г.д. У цэлым праект дасць магчымасць нарасціць сваю вытворчасць паўфабрыкатаў у тры разы, выпуск гатовых кандытарскіх вырабаў", - расказаў намеснік генеральнага дырэктара па развіцці і эканоміцы Аляксандр Кіжук.
Аб'ём вытворчасці паўфабрыкатаў плануецца каля 32 тыс.т. "Набываць мы будзем толькі какававыя зярняты. Усё астатняе будзем вырабляць самі (цёртая какава, какава-алей, какава-парашок). Какававыя зярняты мы імпартуем як з еўрапейскіх краін, так і з Афрыкі, каб дэверсіфікаваць лагістычныя ланцужкі і мінімізаваць рызыкі", - адзначыў ён.
Паводле слоў гендырэктара прадпрыемства Сяргея Анюхоўскага, у адпаведнасці з першай чаргой у планах стварыць каля 120 працоўных месцаў, з уводам другой чаргі - 500-700. "У цэлым мы плануем падвоіць магутнасці "Камунаркі", - падкрэсліў ён.
Паказчыкі 2022 года
"У бягучым годзе ўсе даведзеныя паказчыкі выкананы. Прычым большасць з іх нават перавыканана. У прыватнасці, за 10 месяцаў тэмп росту экспарту склаў амаль 140 працэнтаў. Па заработнай плаце мы выходзім на 127 працэнтаў. Сярэдняя зарплата на прадпрыемстве дасягнула Br2,1 тыс. Паказчыкі па рэнтабельнасці, прыбытку таксама выкананы", - сказаў гендырэктар.
У бягучым годзе "Камунарка" вырабіла ўжо больш за 31 тыс. т прадукцыі. "У натуральным выражэнні мы прыраслі на 4 працэнты. Гэта было дасягнута за кошт аптымізацыі тэхналагічных працэсаў. Аб'ёмы вытворчасці будзем нарошчваць і ў наступным годзе", - адзначыў кіраўнік.
Напярэдадні навагодніх свят штогод кандытарская фабрыка выпускае салодкія падарункі ў шырокім асартыменце і маляўнічым афармленні, а таксама кандытарскія вырабы з навагодняй тэматыкай. Ва ўпакоўках можна знайсці шакалад, шакаладныя цукеркі, ірыс, карамель, новыя віды кандытарскіх вырабаў. "Што датычыцца навагодніх падарункаў, то прадпрыемства ўжо вырабіла запланаваны аб'ём на 2022 год. Цяпер мы больш працуем над індывідуальнымі падарункамі. Гэта тое, што заказваюць некаторыя прадпрыемствы па сваіх рэцэптурах, - паведаміў ён. - У цэлым усё, што выпускаецца, мае павышаны попыт. Мы сфарміравалі пэўныя запасы, каб у сезон падтрымліваць попыт".
Экспарт, новыя рынкі збыту
Калі гаварыць аб структуры паставак, то 47 працэнтаў ад усёй вытворчасці прыпадае на экспарт і 53 працэнты - на ўнутраны рынак. Кампанія адгружае сваю прадукцыю больш як у 20 краін свету. Каля 80 працэнтаў ад аб'ёмаў паставак прыпадае на Расійскую Федэрацыю. "У рамках сваіх вытворчых магчымасцей мы стараліся максімальна замясціць вызваленыя нішы на расійскім рынку. Гэта класічныя гатункі, якія заўсёды карысталіся высокім попытам. Таксама працуем па навінках, стараемся аператыўна рэагаваць на попыт, які фарміруецца на новы від прадукцыі, і задавольваць нашых спажыўцоў", - звярнуў увагу Аляксандр Кіжук.
"Той аб'ём, які прыпадаў на еўрапейскія дзяржавы, мы замясцілі краінамі Сярэдняй Азіі. Сёння добры патэнцыял паказвае рынак Кітая - за 10 месяцаў бягучага года тэмп росту 140 працэнтаў, растуць пастаўкі ва Узбекістан, Арменію, Казахстан. Таксама мы супрацоўнічаем з Турцыяй, Аб'яднанымі Арабскімі Эміратамі", - адзначыў намеснік кіраўніка кандытарскай фабрыкі.
БЕЛТА.
