30 чэрвеня, Мінск /Кар. БЕЛТА/. Палата прадстаўнікоў Нацыянальнага сходу Беларусі прыняла сёння ў першым чытанні папраўкі ў закон "Аб асновах дзяржаўнай маладзёжнай палітыкі", перадае карэспандэнт БЕЛТА.
"З'явіўся новы артыкул, які датычыцца маладзёжнай кадравай палітыкі. Мы лічым, што гэта на сённяшні дзень вельмі важнае і актуальнае пытанне, якім трэба займацца на ўзроўні дзяржавы, - растлумачыў журналістам міністр адукацыі Міхаіл Жураўкоў пасля свайго даклада. - Гэта цэлы комплекс мерапрыемстваў, звязаных з падтрымкай і навучаннем моладзі".
Кіраўнік ведамства зрабіў акцэнт на тым, што гэта робіцца для прыцягнення ў топ-менеджмент адукаваных, ініцыятыўных і падрыхтаваных маладых людзей.
Таксама папраўкі пашыраюць функцыі Мінадукацыі. "Ужо дакладна вызначана, што галоўным дзяржорганам, які займаецца маладзёжнай палітыкай, у нас з'яўляецца Міністэрства адукацыі, што павінна працаваць у цесным узаемадзеянні з іншымі дзяржорганамі", - дадаў міністр.-0-