18 ліпеня, Мінск /Кар. БЕЛТА/. Кансультант упраўлення лясной гаспадаркі Міністэрства лясной гаспадаркі Аляксандр Угрын сёння на прэс-канферэнцыі нагадаў аб правілах збору грыбоў і ягад у Беларусі, перадае карэспандэнт БЕЛТА.
"У адпаведнасці з Лясным кодэксам грамадзяне маюць права без дазвольных дакументаў бясплатна збіраць дзікарослыя ягады і грыбы для задавальнення ўласных патрэб. Пры гэтым трэба збіраць дзікарослыя ягады тымі спосабамі і прыстасаваннямі, якія не наносяць шкоды ягаднікам і не прыводзяць да іх знішчэння. Збор, нарыхтоўка грыбоў павінны праводзіцца з захаваннем грыбніц. Грыбы неабходна зразаць нажом на глебе ля кораня або выкручваць. Разграбанне лясной падсцілкі для збору грыбоў забараняецца", - сказаў Аляксандр Угрын. Тэрміны пачатку збору брусніц і журавін штогод устанаўліваюцца рашэннямі аблвыканкамаў.
За парушэнне правіл нарыхтоўкі, збору або закупкі грыбоў, іншых дзікарослых раслін або іх частак у адпаведнасці з Кодэксам Рэспублікі Беларусь аб адміністрацыйных парушэннях прадугледжваецца вынясенне папярэджання або накладанне штрафу ў памеры да 20 базавых велічынь (БВ складае Br24,5). З пачатку 2018 года службовыя асобы дзяржаўнай лясной аховы за парушэнне правіл нарыхтоўкі і збору грыбоў, іншых дзікарослых раслін і іх частак прыцягнулі да адміністрацыйнай адказнасці 49 парушальнікаў.
Для выяўлення парушальнікаў ляснога заканадаўства лясгасамі з канца 2014 года сталі прымяняцца сродкі фота- і відэафіксацыі. Усяго лясгасы выкарыстоўваюць 526 камер фотафіксацыі, з дапамогай якіх з пачатку 2018 года прыцягнута да адказнасці 232 парушальнікі.-0-
