28 чэрвеня, Мінск /Кар. БЕЛТА/. Кіраўнік дзяржавы Аляксандр Лукашэнка 27 чэрвеня падпісаў распараджэнне, якім зацверджана рашэнне савета спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў аб заахвочванні 495 чалавек. Аб гэтым БЕЛТА паведамілі ў прэс-службе беларускага лідара.
Распараджэннем назначаны стыпендыі Прэзідэнта Рэспублікі Беларусь у памеры Br894 тыс. штомесяц 184 студэнтам і курсантам устаноў вышэйшай адукацыі.
Заахвочвальныя стыпендыі фонду (Br840 тыс. у месяц) на адзін каляндарны год з уручэннем нагруднага знака лаўрэата фонду назначаны двум пераможцам міжнароднай канферэнцыі юных вучоных па фізіцы, матэматыцы, інфарматыцы, экалогіі і Еўрапейскай матэматычнай алімпіяды для дзяўчат.
Прысуджаны таксама грашовыя прэміі ў памеры ад Br8,4 млн да Br11,55 млн з уручэннем нагруднага знака лаўрэата фонду дзесяці пераможцам міжнароднай алімпіяды праектаў маладых вучоных і вынаходнікаў, міжнароднай канферэнцыі юных вучоных па фізіцы, матэматыцы, інфарматыцы, экалогіі і Еўрапейскай матэматычнай алімпіяды для дзяўчат.
Грашовымі прэміямі заахвочаны 299 пераможцаў шэрага рэспубліканскіх алімпіяд і конкурсаў па розных прадметах.
Распараджэнне Прэзідэнта Беларусі накіравана на забеспячэнне адраснай дзяржаўнай падтрымкі адораных навучэнцаў і студэнтаў, стварэнне спрыяльных умоў для іх развіцця.-0-