22 ліпеня, Магілёў /Кар. БЕЛТА/. У горадабудаўнічы план Магілёва неабходна дабавіць глянцу і гармоніі. Гэтага запатрабаваў Прэзідэнт Беларусі Аляксандр Лукашэнка, заслухоўваючы даклад аб развіцці вобласці, перадае карэспандэнт БЕЛТА.
"Я сёння спецыяльна ўязджаў у горад з боку Мінска. І дамы быццам бы ёсць прыгожыя... Але няма глянцу, добраўпарадкавання і зручнасці для людзей, - сказаў Аляксандр Лукашэнка. - Гармоніі ніякай".
Прэзідэнт адзначыў, што ў астатніх абласных цэнтрах ужо наведзены парадак і створана ўтульнасць. Аднак Магілёў адстае па гэтых пазіцыях. "Трэба разгледзець ва ўрадзе пытанне, чым мы можам дапамагчы ў гэтым напрамку. Але галоўнае, каб у вас быў па-гаспадарску складзены план мадэрнізацыі горада, - звярнуўся кіраўнік дзяржавы да кіраўніцтва Магілёва. - Трэба да канца года нарысаваць і начарціць, якім будзе горад, пачынаючы ад галоўных магістралей і ўезду".
Аляксандр Лукашэнка дадаў, што да добраўпарадкавання горада таксама неабходна прыцягваць яго жыхароў. "Магіляўчане - чулыя людзі", - заўважыў ён.
"Горад Магілёў за гэту пяцігодку трэба прывесці ў ідэальны стан. Дзякуй богу, у гарадскім бюджэце з'явіўся хоць нейкі прафіцыт, - падкрэсліў Прэзідэнт. - Я ўпэўнены, што з Магілёвам мы справімся. Трэба прывесці горад у парадак, і тут для гэтага ёсць усё, асаблівая яго жамчужына - Днепр".-0-