21 сакавіка, Магілёў /Міхаіл Маціеўскі - БЕЛТА/. Вынаходства лякарства ад раку і ўнікальнай крыніцы энергіі стала б прарывам для беларускай навукі. Аб гэтым Прэзідэнт Беларусі Аляксандр Лукашэнка заявіў сёння ў час сустрэчы ў Магілёве з работнікамі прадпрыемстваў кампаніі "Кранаспан", перадае карэспандэнт БЕЛТА.
"Я вельмі хацеў бы, каб наша навука зрабіла прарыў у лячэнні людзей, і самае галоўнае, каб мы нарэшце перамаглі гэту страшную чуму, страшную хваробу, з якой мы не можам справіцца. Калі б тут быў прарыў, і мы навучыліся лячыць ракавыя пухліны, як звычайную хваробу, гэта было б шчасце", - лічыць Аляксандр Лукашэнка.
Прэзідэнт звярнуў увагу, што ў краіне даўно вядуцца навуковыя даследаванні ў гэтым напрамку. Беларускія медыкі ўжо зрабілі нямала, навучыліся дыягнаставаць захворванне на ранняй стадыі і праводзіць унікальныя аперацыі.
"Яшчэ я хацеў бы, каб нашы вучоныя вынайшлі нейкую новую крыніцу энергіі, каб мы на каленях не поўзалі нават перад нашымі братамі, молячы іх і выпрошваючы тону нафты або кубаметр газу", - дадаў кіраўнік дзяржавы.
Прэзідэнт звярнуў увагу, што беларускія вучоныя перыядычна ствараюць важныя распрацоўкі, аднак на прадпрыемствах іх укараняць адмаўляюцца. На думку кіраўніка дзяржавы, так быць не павінна - ўсе вынаходкі, якія могуць удасканаліць і спрасціць працэс вытворчасці, неабходна абавязкова выкарыстоўваць.-0-