27 лютага, Мінск /Кар. БЕЛТА/. Старшыня Парламенцкай асамблеі Арганізацыі па бяспецы і супрацоўніцтве ў Еўропе (АБСЕ) Крысцін Мутонен плануе наведаць Беларусь 15-17 сакавіка. Аб гэтым паведаміў сёння журналістам намеснік старшыні Палаты прадстаўнікоў Нацыянальнага сходу Баляслаў Пірштук, перадае карэспандэнт БЕЛТА.
У час гэтага візіту плануецца падпісанне пагаднення паміж Нацыянальным сходам Беларусі і ПА АБСЕ аб правядзенні 26-й штогадовай сесіі.
Баляслаў Пірштук нагадаў, што ў Беларусі створаны рэспубліканскі арганізацыйны камітэт па падрыхтоўцы і правядзенні ў Мінску 26-й штогадовай сесіі, узначаліў яго старшыня Палаты прадстаўнікоў Уладзімір Андрэйчанка. Першае пасяджэнне аргкамітэта запланавана на 1 сакавіка, будуць пастаўлены задачы і вызначаны этапы падрыхтоўкі будучых мерапрыемстваў. Затым прыкладна з перыядычнасцю раз у месяц аргкамітэт будзе засядаць у пашыраным складзе.
У цэлым плануецца насычаная праграма, якая ўключае пасяджэнне пастаяннага камітэта ПА АБСЕ і агульных камітэтаў ПА АБСЕ па палітычных пытаннях і бяспецы; па эканамічных пытаннях, навуцы, тэхналогіі і навакольным асяроддзі; па дэмакратыі, правах чалавека і гуманітарных пытаннях. Прадугледжваецца правядзенне пленарнага пасяджэння, а таксама афіцыйных прыёмаў.
Акрамя таго, для замежных гасцей падрыхтавана культурная праграма, аднак яна будзе арганізавана не на шкоду пасяджэнням пастаянных камітэтаў. Замежным парламентарыям прапанавана даволі шмат турыстычных маршрутаў, якія выходзяць на межы Мінска. Напрыклад, гэта наведванне музея гісторыі Вялікай Айчынная вайны, Міра і Нясвіжа, аглядныя экскурсіі па сталіцы. "Важна, каб у гасцей было цэласнае ўражанне ад знаходжання ў нашай рэспубліцы", - сказаў Баляслаў Пірштук.
Віцэ-спікер упэўнены, што пераважная большасць дэпутатаў ПА АБСЕ з вялікім інтарэсам чакаюць сустрэчы ў Беларусі. "Для нас вельмі важна, каб гэта мерапрыемства прайшло на высокім узроўні. У нас будзе добрая падстава паказаць усе моцныя бакі нашай рэспублікі з тым, каб 2017 год быў прарыўным у плане пашырэння інтарэсаў Беларусі, перш за ўсё, у заходнім напрамку", - сказаў ён.
Як паведамлялася, летняя сесія ПА АБСЕ пройдзе ў Мінску 5-9 ліпеня і будзе прысвечана ўмацаванню ўзаемнага даверу і супрацоўніцтва ў імя міру і працвітання ў рэгіёне.
Парламенцкая асамблея АБСЕ была створана ў красавіку 1991 года ў Мадрыдзе (Іспанія), у яе рабоце ўдзельнічаюць 323 парламентарыі, якія прадстаўляюць 57 краін. Асноўнымі задачамі з'яўляюцца садзейнічанне міжпарламенцкаму дыялогу, падтрымка дэмакратычных інстытутаў у дзяржавах - удзельніцах АБСЕ, развіццё супрацоўніцтва і бяспекі ў рэгіёне. Галоўная падзея ў дзейнасці ПА АБСЕ - штогадовая летняя сесія, на якой выбіраюцца кіраўніцтва і службовыя асобы асамблеі, прымаюцца дэкларацыі і рэзалюцыі.
25-я сесія ПА АБСЕ праходзіла ў пачатку ліпеня 2016 года ў Тбілісі (Грузія).-0-
