За плячамі ў дэпутата нацыянальнага парламента павінна быць пэўная жыццёвая школа. Такое меркаванне выказаў 11 верасня, размаўляючы з журналістамі, старшыня Брэсцкага аблвыканкама Анатоль Ліс, перадае карэспандэнт БЕЛТА.
"На мой погляд, гэта павінен быць чалавек, які прайшоў пэўную школу ўжо, мае вопыт работы на той ці іншай пасадзе, на тым ці іншым месцы. Чалавек адказны, які ідзе ў парламент не з-за палітычных амбіцый, а думае аб тым, як зрабіць лепшым жыццё ў сваім рэгіёне", - адзначыў Анатоль Ліс.
Ён падкрэсліў, што работа над законамі вельмі важна. "Сёння праходзяць складаныя працэсы ў эканоміцы. Таму і заканадаўчая база не павінна адставаць у гэтым плане. Неабходна прыняць законы, якія стымулявалі б развіццё малога і сярэдняга бізнесу, работу прамысловасці, сельскагаспадарчых прадпрыемстваў. Гэтыя пытанні павінны разглядацца ў парламенце і ў спакойнай абстаноўцы прымацца", - выказаў свой пункт гледжання губернатар.
На выбарчы ўчастак нумар 1 Брэсцкай-Заходняй акругі нумар 1, размешчаны ў музычным каледжы імя Р.Шырмы, Анатоль Ліс прыйшоў у ліку першых выбаршчыкаў. Пасля выканання неабходных фармальнасцей губернатар атрымаў выбарчы бюлетэнь і прыняў удзел у галасаванні. Выбіраць старшыні аблвыканкама давялося з шасці кандыдатаў, якія балаціруюцца па гэтай акрузе.
Як паведаміў старшыня ўчастковай выбарчай камісіі Рамуальд Жабінскі, больш за чвэрць выбаршчыкаў, якія пражываюць на тэрыторыі гэтага выбарчага ўчастка, прагаласавалі датэрмінова. У цэлым жа па вобласці за пяць папярэдніх дзён выбарчыя ўчасткі наведалі 28,52 працэнта выбаршчыкаў рэгіёна. Каменціруючы па просьбе карэспандэнта БЕЛТА лічбы датэрміновага галасавання, Анатоль Ліс сказаў: "Я лічу, тут спаборніцтва быць не можа. Выбары ў нас праходзяць у спакойнай абстаноўцы. Кожны выбіраў сам: каму зручна было прагаласаваць загадзя, ён ішоў. Каму - не, я ўпэўнены, што яны сёння прагаласуюць".
Галасаванне па выбарах дэпутатаў Палаты прадстаўнікоў Нацыянальнага сходу шостага склікання Брэсцкай вобласці праходзіць на 928 выбарчых участках.
