29 верасня, Мінск /Кар. БЕЛТА/. Місія Міжнароднага валютнага фонду будзе працаваць у Мінску з 26 кастрычніка па 10 лістапада, паведамілі карэспандэнту БЕЛТА ў прадстаўніцтве МВФ у Беларусі.
У прадстаўніцтве фонду растлумачылі, што эксперты МВФ прыедуць для правядзення штогадовых кансультацый па IV артыкуле.
Як паведамляў напярэдадні першы намеснік міністра фінансаў Беларусі Максім Ермаловіч, перагаворы па новай праграме з фондам пакуль прыпынены. "Работа над падрыхтоўкай праграмы прыпынена, таму што фактычна праграма гатова, перагаворы па ёй завершаны. Ёсць разыходжанні ў пазіцыях, і гэтыя разыходжанні мы прадаўжаем збліжаць, цяпер кожны ў сваёй частцы. Аднаўленне будзе магчыма толькі пасля таго, як мы зробім запыт аб прадаўжэнні праграмы і правядзём шэраг спецыяльных дзеянняў, якія прадугледжаны праграмай сацыяльна-эканамічнага развіцця", - расказаў першы намеснік міністра.
Пры гэтым ён растлумачыў, што Мінфін прадаўжае супрацоўніцтва з Міжнародным валютным фондам у рамках работы над параметрамі бюджэтнай збалансаванасці і рэалізацыі падаткова-бюджэтнай палітыкі. "Мы вядзём супрацоўніцтва з МВФ і па тэхнічнай дапамозе, па падтрымцы праектаў, якія рэалізуюцца Мінфінам", - дадаў першы намеснік міністра.
Апошні раз місія МВФ працавала ў Беларусі 5-12 чэрвеня. Эксперты фонду на чале з кіраўніком місіі па Беларусі Пітэрам Долманам абмеркавалі з прадстаўнікамі органаў дзяржкіравання эканамічную сітуацыю ў краіне, а таксама актуальныя пытанні ўзаемадзеяння, у прыватнасці, падрыхтоўку да штогадовых кансультацый па IV артыкуле, якія адбудуцца восенню 2017 года.-0-
