12 снежня, Мінск /Кар. БЕЛТА/. Экспарт медыцынскіх і фармацэўтычных тавараў і паслуг з Беларусі за студзень-верасень 2017 года дасягнуў $63,6 млн. Аб гэтым паведаміў міністр аховы здароўя Валерый Малашка на секцыі "Медыцынскія і фармацэўтычныя навукі" II З'езда вучоных Беларусі, перадае карэспандэнт БЕЛТА.
У красавіку Прэзідэнт Беларусі ў штогадовым Пасланні беларускаму народу і Нацыянальнаму сходу адзначыў, што ў гэтым годзе плануецца атрымаць ад экспарту медыцынскіх паслуг $40 млн. "Гэта планка пераадолена ўжо", - сказаў Валерый Малашка. За дзевяць месяцаў экспарт медыцынскіх і фармацэўтычных тавараў і паслуг (уключаючы адукацыйныя) з улікам усіх каналаў рэалізацыі дасягнуў $63,6 млн.
Доля айчынных лякарстваў на рынку рэспублікі сёння складае ў вартасным выражэнні больш за 56 працэнтаў. Удзельная вага экспарту лекавых сродкаў у агульным аб'ёме вытворчасці ацэньваецца на ўзроўні 27 працэнтаў. Прадпрыемствы фармацэўтычнай прамысловасці рэспублікі экспартуюць уласную прадукцыю ў 32 краіны свету.
Па выніках студзеня-жніўня 2017 года зарэгістраваны і ў стадыі асваення знаходзяцца 72 новыя лекавыя сродкі. За студзень-верасень зацверджаны і пачалі ўкараняцца больш за 100 новых метадаў аказання медыцынскай дапамогі. У 2016-2017 гадах укаранёны ў практыку аховы здароўя звыш 250 новых медыцынскіх тэхналогій, распрацаваных беларускімі вучонымі-медыкамі ў папярэднія гады ў рамках навуковай і навукова-тэхнічнай дзейнасці дзяржаўных навуковых арганізацый.
Акрамя таго, Міністэрства аховы здароўя мэтанакіравана і сістэматычна праводзіць работу па павелічэнні эфектыўнасці аспірантуры і дактарантуры. Прынятыя меры прывялі да таго, што практычна ўсе выпускнікі аспірантур і дактарантур абараняюцца або на працягу тэрміну навучання, або праз некалькі гадоў пасля завяршэння. Эфектыўнасць аспірантуры складае амаль 90 працэнтаў.
Нягледзячы на гэтыя дасягненні, паводле слоў Валерыя Малашкі, перад медыцынскай і фармацэўтычнай навукай і галіной аховы здароўя ў цэлым стаіць задача далейшага паступальнага інавацыйнага развіцця.-0-
