5 сакавіка, Мінск /Аліна Грышкевіч - БЕЛТА/. Дні Франкафоніі пройдуць у Беларусі 5-30 сакавіка, паведамілі карэспандэнту БЕЛТА ў пасольстве Францыі ў Мінску.
"Кожны год вясной мільёны франкафонаў усяго свету адзначаюць свята Франкафоніі і французскай мовы. Мерапрыемствы, прымеркаваныя да 20 сакавіка, міжнароднага дня Франкафоніі, накіраваны на распаўсюджванне французскай мовы і франкафонных культур. У гэтым годзе мінчанам і гасцям сталіцы будуць прапанаваны мерапрыемствы, прысвечаныя гастраноміі, тэатру, музыцы, фатаграфіі, архітэктуры і кіно", - расказалі ў дыпламатычнай місіі.
Дні Франкафоніі будуць арганізаваны пасольствам Францыі ў Беларусі пры падтрымцы канцэртнага агенцтва "Эквілібрыум Артс", аддзялення пасольства Швейцарыі ў Мінску, пасольства Канады ў Польшчы, Школы архітэктурнага мыслення для дзяцей, Белдзяржфілармоніі, МДЛУ і іншых.
Мерапрыемства стартуе 5 сакавіка канцэртам французскай групы "Le Bal des Martinne". На танцполе ў час выступлення артыстаў пераплятуцца вальсы, гарачыя кубінскія танцы, італьянскія песні, музыка ў стылі клезмер.
У гэты ж дзень пачне працаваць фотавыстаўка "Падарожжа па Франкафоніі", якая прадоўжыцца па 28 сакавіка ў візавай зале пасольства Францыі ў Мінску. На экспазіцыі будуць прадстаўлены фатаграфіі маладога француза Фларыяна Карубі (добраахвотніка ЮНЕСКА ў Беларусі), зробленыя ў час яго шматлікіх падарожжаў.
Канцэрт Дзяржаўнага камернага аркестра Беларусі пад кіраўніцтвам Яўгена Бушкова з удзелам вядомага скрыпача Нікаля Датрыкура (Францыя) і віяланчаліста Мікаэля Самсонава (Беларусь - Германія) запланаваны на 10 сакавіка ў Белдзяржфілармоніі. У час гэтага сумеснага канцэрта Нікаля Датрыкур сыграе фрагменты канцэртаў з твораў Бетховена, Ізаі і Гайдна на сваім цудоўным інструменце Антоніа Страдывары. Гэты інструмент, які датуецца 1713 годам, быў шчодра прадастаўлены яму ў карыстанне ўладальнікам Бернарам Магрэ.
Затым 14 сакавіка праграма Дзён прадоўжыцца паказам дакументальнага фільма швейцарскай вытворчасці "Цыклічны" ў сталічным кінатэатры "Піянер". На 20 сакавіка намечаны канцэрт французскага піяніста Аліўе Мулена ў Брэсцкай філармоніі.
Праграмай таксама прадугледжана сустрэча Надзвычайнага і Паўнамоцнага Пасла Францыі ў Беларусі Дзідзье Канеса з 15 навучэнцамі Мінска і дыскусія на французскай мове па актуальных тэмах.
Адкрыццё выстаўкі фатаграфій "Позірк" 21 сакавіка пройдзе ў Музеі гісторыі горада. Дарэчы, на гэты ж дзень запланавана "Вячэра па-французску". Гэта мерапрыемства з серыі "Смак Францыі" адбудзецца ў Беларусі ўжо чацвёрты раз. У гэтым годзе пятнаццаць беларускіх рэстаранаў (14 - у Мінску і 1 - у Гомелі) і кулінарная школа прымуць удзел у французскай вячэры. Кожная з такіх устаноў грамадскага харчавання распрацавала для беларускай публікі меню з улікам усёй шматграннасці, вытанчанасці і самабытнасці французскай кухні. У Беларусі "Смак Францыі" будзе адкрыты Дзідзье Канесам. Госці таксама змогуць пабываць на майстар-класе па французскай кухні.
Цікавай абяцае быць і віктарына па Франкафоніі, якая намечана на 23 сакавіка ў Французскай медыятэцы. Яна арганізуецца для франкамоўных школьнікаў-старшакласнікаў Мінска, у тым ліку для тэсціравання і паляпшэння іх ведаў аб такой з'яве, як Франкафонія. На віктарыне давядзецца адказаць на пытанні аб французскай мове, але асаблівае значэнне будзе надавацца рэгіянальным французскім выразам. Каманда-пераможца атрымае прызы.
Гала-канцэрт у гонар Дзён Франкафоніі запланаваны на 28 сакавіка ў МДЛУ. На гэту ўрачыстасць запрошаны школьнікі, іх бацькі, выкладчыкі французскай мовы ў беларускіх школах, а таксама ўсе, хто любіць французскую мову і гаворыць на ёй. Каля паўсотні дзяцей і студэнтаў прадставяць сваё майстэрства на сцэне. Яны прыедуць з розных рэгіёнаў для паказу спектакля, які рыхтавалі на працягу года. Арганізатары абяцаюць, што можна разлічваць на прысутнасць прадстаўнікоў пасольстваў і з такіх краін, як Балгарыя, Румынія, Малдова, Швейцарыя, Арменія, Грэцыя. На цырымоніі будуць уручаны прызы пераможцам конкурсу "Маладога пісьменніка на французскай мове". Гэтыя мерапрыемствы адбудуцца дзякуючы Асацыяцыі выкладчыкаў французскай мовы пры ўдзеле і актыўнай падтрымцы пасольства Францыі. Вечар будзе адзначаны дзвюма інтэрмедыямі з традыцыйнымі танцамі франкамоўных краін і Францыі.
Але на гэтым праграма Дзён не завершыцца. Так, 29 сакавіка пройдзе сеанс "Пытанняў свету" ў Французскай медыятэцы - своеасаблівае падарожжа па Франкафоніі. 30 сакавіка там жа адбудзецца паказ фільма "Недагледжаная галава".-0-
