
15 чэрвеня, Мінск /Кар. БЕЛТА/. У Латвіі склалася беспрэцэдэнтная сітуацыя: у самым пачатку лета, калі да наступнага ацяпляльнага сезона яшчэ далёка, мясцовыя жыхары з самай раніцы становяцца ў доўгія чэргі, спадзеючыся купіць драўняныя гранулы, паведамляе партал навін Baltijas Balss.
Каб купіць драўняныя гранулы, якімі можна ацяпляць дамы, людзям даводзіцца стаяць у чэргах па некалькі гадзін. Пры гэтым у некаторых месцах гранулы ўжо распрададзены, у іншых яны прапануюцца толькі ў невялікіх аб'ёмах.
Паводле слоў латвійскага эксперта Дзідзіса Палейса, рынак энергетычнай драўніны перажывае няпросты час. Аналагічная сітуацыя сёння складваецца і ў іншых галінах, звязаных з энергарэсурсамі.
У мінулыя гады праблем з рэалізацыяй драўняных гранул не было. Латвія за год вырабляе звыш 2 млн т гранул, пры гэтым унутраны попыт складае 200 тыс. т. Аднак у гэтым годзе попыт значна павялічыўся. Латвійцы спрабуюць засцерагчы сябе ад небяспекі ў наступным ацяпляльным сезоне і скупляюць драўняныя гранулы на рынку. Пры гэтым людзі нярэдка купляюць значна большыя аб'ёмы, чым патрабуюцца для праходжання ацяпляльнага сезона. Гэта правакуе няхватку гранул і павышэнне іх кошту, адзначае Палейс.
Аналагічная сітуацыя цяпер складваецца ва ўсіх краінах Еўропы, дзе расце попыт на гранулы, дровы і брыкеты.-0-