13 мая, Мінск /Кар. БЕЛТА/. Улады Нарвегіі плануюць да сярэдзіны мая адкрыць усе школы краіны, паколькі, на думку спецыялістаў, перавод дзяцей на дамашняе навучанне не аказаў значнага ўплыву на распаўсюджванне COVID-19 у краіне, паведамляе Euronews.
У Нарвегіі пачатковыя класы зноў пачалі заняткі яшчэ два тыдні таму наперакор пратэстам некаторых бацькоў, якія гаварылі пра небяспеку распаўсюджвання каранавіруснай інфекцыі праз іх дзяцей. Затым за парты вярнуліся навучэнцы старшых класаў.
"Няма дастаткова пераканаўчых доказаў таго, што закрыццё школ паўплывала на распаўсюджванне віруса", - гаворыцца ў паведамленні Нарвежскага інстытута аховы здароўя.
Эксперты не толькі выступілі супраць далейшай ізаляцыі вучняў, але і ў цэлым ставяць пад сумненне гіпотэзу аб тым, што дзеці адыгрываюць важную ролю ў распаўсюджванні COVID-19. У Нарвежскім інстытуце аховы здароўя паведамілі, што пры вывучэнні гісторый хворых не было выяўлена ніводнага пацверджанага выпадку заражэння ад носьбітаў каранавіруса, якім было б менш за 20 гадоў.
Раней да падобных высноў прыйшоў французскі эпідэміёлаг Коста Дані, які даследаваў распаўсюджванне інфекцыі ў адным з ачагоў COVID-19 у Верхняй Савоі. Дзіця, якое апынулася ў цэнтры ўвагі яго работы, як высветлілася, не заразіла ні сваіх блізкіх, ні іншых дзяцей, з якімі кантактавала.-0-
