Сцяг Чацвер, 18 ліпеня 2024
Усе навіны
Усе навіны
У свеце
08 лютага 2024, 14:26

За пасаду прэзідэнта Расіі будуць змагацца 4 кандыдаты

8 лютага, Масква /Эдуард Півавар - БЕЛТА/. У Расіі завершана рэгістрацыя кандыдатаў на маючых адбыцца выбарах прэзідэнта краіны. 8 лютага Цэнтрвыбаркам Расіі правёў пасяджэнне, па выніках якога канчаткова вызначыўся спіс прэтэндэнтаў на вышэйшую дзяржаўную пасаду, перадае карэспандэнт БЕЛТА.

"У нас па выніках пасяджэння ёсць поўная яснасць, што ў выбарчых бюлетэнях будзе чатыры кандыдаты", - сказала кіраўнік ЦВК РФ Эла Памфілава.

Такім чынам, у бюлетэні для галасавання будуць унесены прозвішчы раней зарэгістраваных ЦВК кандыдатаў: дзеючага прэзідэнта Расіі Уладзіміра Пуціна, які ідзе на выбары ў якасці самавылучэнца, Леаніда Слуцкага, вылучанага ад ЛДПР, Мікалая Харытонава ад КПРФ і Уладзіслава Даванкова ад партыі "Новыя людзі".

На пасяджэнні 8 лютага ЦВК Расіі адмовіла ў рэгістрацыі ў якасці кандыдатаў лідару партыі "Камуністы Расіі" Сяргею Малінковічу і вылучэнцу ад партыі "Грамадзянская ініцыятыва" Барысу Надзеждзіну. У абодвух працэнт браку ў падпісных лістах выбаршчыкаў перавышае дапушчальныя 5 працэнтаў: у Барыса Надзеждзіна недакладнымі прызнаны больш за 15 працэнтаў подпісаў, у Сяргея Малінковіча - амаль 15 працэнтаў. Акрамя таго, ЦВК афіцыйна зацвердзіла зняцце з выбараў блогера-эколага Анатоля Баташова, які яшчэ 31 студзеня заявіў аб выхадзе з перадвыбарнай кампаніі, а таксама б’юці-блогера Рады Рускіх, якая здала ў Цэнтрвыбаркам 476 подпісаў з неабходных для рэгістрацыі на выбарах 300 тыс.

Раней на этапе збору подпісаў з перадвыбарнай гонкі выбылі лідар партыі "Расійскі агульнанародны саюз" Сяргей Бабурын, вылучэнец ад Расійскай партыі свабоды і справядлівасці Андрэй Багданаў і Ірына Свірыдава, якая прадстаўляла Дэмакратычную партыю Расіі.

Агітацыйная кампанія кандыдатаў у прэзідэнты РФ пачнецца 17 лютага, яна прадоўжыцца да нуля гадзін па мясцовым часе 15 сакавіка. Савет Федэрацыі назначыў выбары на 17 сакавіка, пры гэтым Цэнтрвыбаркам РФ вырашыў, што галасаванне прадоўжыцца тры дні: 15, 16 і 17 сакавіка. Такім чынам, гэта будуць першыя трохдзённыя выбары прэзідэнта РФ.-0-
Падпісвайцеся на нас у
Twitter
Топ-навіны
Свежыя навіны Беларусі