20 лютага, Мінск /Кар. БЕЛТА/. Рашэнне Польшчы павялічыць колькасць лесанарыхтоўчых работ на тэрыторыі Белавежскай пушчы ідзе ўразрэз з нормамі Еўрапейскага саюза (ЕС), заявіў генеральны адвакат суда ЕС Іў Бот, паведамляе ТАСС.
Паводле слоў Іва Бота, лесанарыхтоўчыя работы прыводзяць да пагаршэння ўмоў у месцах размнажэння ахоўных відаў жывёл. Такія дзеянні ідуць уразрэз з праграмай Еўрасаюза па ахове біяразнастайнасці на тэрыторыі краін - членаў супольніцтва.
Спрэчкі вакол Белавежскай пушчы разгарэліся некалькі месяцаў таму. Згодна з планамі ўрада Польшчы, высечцы ў запаведніку падлягалі каля 1,3 млн дрэў, пашкоджаных жуком-караедам. Эколагі выступалі супраць гэтых дзеянняў і патрабавалі даць магчымасць рэліктаваму лесу самастойна справіцца з натуральнымі працэсамі абнаўлення масіву.
У лістападзе суд ЕС пастанавіў, што Польшча павінна неадкладна спыніць актыўнае лесакарыстанне ў Белавежскай пушчы, за выключэннем выпадкаў, калі гэта строга неабходна для забеспячэння грамадскай бяспекі. Калі Польшча парушыць гэту пастанову, суд абавяжа яе выплачваць Еўракамісіі па меншай меры 100 тыс. еўра ў дзень.-0-