22 кастрычніка, Мінск /Кар. БЕЛТА/. Хірургічныя маскі дазваляюць у некаторых выпадках нават на 80 працэнтаў знізіць пагрозу, што каранавірус трапіць у арганізм, аднак не выключаюць небяспеку да канца. Гэта паказаў унікальны эксперымент, праведзены ў Інстытуце медыцыны пры Такійскім універсітэце, паведамляе ТАСС са спасылкай на японскую тэлерадыёкампанію NHK.
Спецыялісты размясцілі ў ізаляванай прасторы на адлегласці 50 см галовы манекенаў з датчыкамі. Адна з іх удыхала навакольнае паветра, а другая выкідвала ў яго каранавірус разам са сліной, імітуючы пакашліванне.
Пападанне каранавіруса скарачалася на 17 працэнтаў пры выкарыстанні на ўдыхаючай галаве маскі з матэрыі і на 47 працэнтаў - пры прымяненні звычайнай хірургічнай трохслаёвай маскі. Спецыялізаваны рэспіратар тыпу N95 скарачаў пападанне каранавіруса прыкладна на 79 працэнтаў.
Калі ж маска з матэрыі або хірургічная маска была надзета на галаву, што выкідвае каранавірус, то яго паглынанне ўдыхаючай галавой без маскі змяншалася больш як на 70 працэнтаў.
Прымяненне хірургічных масак на абодвух манекенах скарачала колькасць вірусаў, што трапляюць у арганізм, на 80 працэнтаў, аднак цалкам не выключала пагрозу заражэння.
Такі эксперымент з выкарыстаннем каранавіруса быў праведзены ўпершыню, расказаў кіраўнік групы даследчыкаў прафесар Есіхіра Каваока. "Нашы вопыты паказалі, - адзначыў ён, - што насіць маскі ў перыяд пандэміі вельмі важна, аднак не трэба ў іх празмерна верыць". На думку вучонага, важна разумець: маскі не могуць цалкам блакіраваць вірусы.-0-
