25 мая, Мінск /Кар. БЕЛТА/. Старшыня Дзяржаўнай думы Вячаслаў Валодзін заявіў, што Расія будзе ўносіць плацяжы па знешнім доўгу ў сваёй нацыянальнай валюце. Вашынгтону і сатэлітам, якія яго падтрымліваюць, пара прывыкаць да расійскага рубля. Аб гэтым ён напісаў у сваім Telegram-канале.
Валодзін пракаменціраваў рашэнне амерыканскага Мінфіна не прадаўжаць ліцэнзію на абслугоўванне знешняга доўгу РФ. Паводле яго слоў, такім чынам амерыканскія ўлады, спрабуючы стварыць цяжкасці Маскве, стварылі штучную забарону на выплаты па дзярждоўгу ў доларах.
Разам з тым Валодзін адзначыў, што Расія ўжо выпрацавала неабходныя рашэнні. "Па-першае, усе неабходныя грашовыя сродкі на выплаты ёсць. Па-другое, плаціць будзем у рублях. Гэта ўсвядомлены выбар ЗША. Яны самі забаранілі выплаты ў доларах", - напісаў Валодзін.
Ён адзначыў, што расійская нацыянальная валюта апошнім часам значна ўмацавалася. Таму для Расіі сфарміравалася спрыяльная кан'юнктура на рынку.
Старшыня Дзяржаўнай думы таксама адзначыў, што ў Расіі ўжо ёсць вопыт правядзення ўзаемаразлікаў у рублях. Гэта прадэманстравалі і кантракты на пастаўкі газу. "А ЗША і сатэліты, якія падтрымліваюць іх рашэнні, няхай прывыкаюць да рубля", - рэзюмаваў Валодзін.-0-
