17 ліпеня, Мінск /Кар. БЕЛТА/. Пераходны ваенны савет Судана і апазіцыйны альянс "Сілы за свабоду і перамены" падпісалі палітычнае пагадненне, прызначанае пракласці шлях да дэмакратычных пераўтварэнняў у краіне, паведамляе Reuters.
Пагадненне падпісана сёння раніцай у Хартуме ў прысутнасці пасрэднікаў - Эфіопіі і Афрыканскага саюза. У дакуменце ўдакладняюцца некаторыя дэталі пагаднення аб раздзяленні ўлады, дасягнутага бакамі ў пачатку ліпеня.
Паводле слоў намесніка старшыні ваеннага савета Судана Мухамеда Хамдана Дагалы, падпісанне пагаднення з'яўляецца гістарычным момантам для краіны.
Ваенны савет Судана і апазіцыя ўсё яшчэ працуюць над Канстытуцыйнай дэкларацыяй, якая, як чакаецца, будзе падпісана 19 ліпеня.
Армія Судана 11 красавіка аб'явіла аб адхіленні прэзідэнта Амара аль-Башыра ад улады, роспуску парламента і дзеючых органаў улады. У маі ваенны савет, сфарміраваны пасля адхілення ад улады прэзідэнта краіны, і прадстаўнікі апазіцыі дамовіліся аб устанаўленні пераходнага перыяду на тры гады. Аднак спрэчкі ў пытаннях кіраўніцтва краінай прадоўжыліся.
Апазіцыя і ваенны савет Судана 5 ліпеня дасягнулі пагаднення аб раздзяленні ўлады ў пераходны перыяд да правядзення выбараў. Бакі дамовіліся стварыць суверэнны савет з пяці ваенных і пяці грамадзянскіх асоб, які будзе дзейнічаць як мінімум тры гады. На працягу першай палавіны тэрміну дзеяння пераходнага савета кіраваць ім будуць ваенныя асобы, у другой палавіне - грамадзянскія. Бакі таксама згадзіліся сфарміраваць незалежны ўрад і пачаць празрыстае расследаванне актаў насілля, якія адбываліся ў краіне ў апошнія тыдні.-0-
