25 ліпеня, Мінск /Кар. БЕЛТА/. У нацыянальным брытанскім парку на астравах Фарн, якія знаходзяцца за некалькі кіламетраў ад узбярэжжа Вялікабрытаніі, успыхнуў птушыны грып. Гэта пагражае ператварыцца ў беспрэцэдэнтную трагедыю для дзікай прыроды, піша газета The Guardian.
Астравы Фарн з'яўляюцца нацыянальным прыродным запаведнікам, у якім пражывае каля 200 тыс. марскіх птушак, уключаючы кайр, маёвак, гагарак і бакланаў, а таксама палярных крачак і тупікаў.
Супрацоўнікі нацпарку ў спецыяльных ахоўных касцюмах сабралі ўжо больш за 3 тыс. мёртвых птушак, якіх яны плануюць спаліць для ліквідацыі распаўсюджвання інфекцыі. Але пагроза распаўсюджвання за межы вострава застаецца, паколькі некалькі тысяч хворых птушак упалі з абрываў у Паўночнае мора.
Як піша выданне, вучоныя лічаць, што ўспышка птушынага грыпу каля берагоў Вялікабрытаніі можа прывесці да беспрэцэдэнтнай трагедыі для дзікай прыроды.
Кіраўнік аддзела Нацыянальнага фонду па захаванні прыроды і аднаўленні экалогіі Бен Маккарці занепакоены гэтай падзеяй, таму што гэта хвароба зводзіць на нішто дзесяцігоддзі напружанай работы па аднаўленні прыроды. Маштаб гэтай катастрофы патрабуе тэрміновага нацыянальнага плана рэагавання на вірус сярод дзікіх птушак.
Газета паведамляе, што кожны год архіпелаг наведваюць 45 тыс. чалавек, але з-за інфекцыі ў гэтым месяцы астравы закрыты для наведвальнікаў.-0-
