24 лістапада, Брусель /БЕЛТА - ТАСС/. Праграма "Усходняга партнёрства" - прыярытэт для Еўрасаюза, заявіў сёння прэм'ер-міністр Эстоніі Юры Ратас пасля прыбыцця на пяты саміт праграмы "Усходняе партнёрства" ў Бруселі.
"Я сапраўды спадзяюся, што сёння мы зможам адказаць на пытанне, як мы можам "Усходняе партнёрства" яшчэ больш умацаваць, умацаваць для народаў шасці краін і ЕС", - заявіў ён.
Паводле слоў Юры Ратаса, ЕС хоча зрабіць праграму "Усходняга партнёрства" мацнейшай і больш эфектыўнай для ўсіх яе грамадзян краін-членаў. "Сёння "Усходняе партнёрства" сапраўды знаходзіцца ў сэрцы ЕС", - дадаў ён.
"Усходняе партнёрства" - ініцыятыва ЕС, накіраваная на ўмацаванне ўзаемаадносін паміж Еўрапейскім саюзам і Арменіяй, Азербайджанам, Беларуссю, Грузіяй, Малдовай і Украінай. Гэта ініцыятыва з'явілася як асаблівае ўсходняе прадаўжэнне Еўрапейскай палітыкі суседства, якая прадугледжвае наладжванне як двухбаковых, так і шматбаковых адносін.-0-