21 студзеня, Ухань /БЕЛТА - Сіньхуа/. Улады кітайскага горада Ухань прынялі меры па ўзмацненні кантролю над пасажырапатокам і забаранілі выезд арганізаваных турыстычных груп у іншыя рэгіёны Кітая ў сувязі з распаўсюджваннем пнеўманіі новага тыпу, інфармуе мясцовы камітэт па ахове здароўя.
Паведамляецца, што экстранны рэжым будзе дзейнічаць кругласутачна. Паліцыя пачала ўжо ўзмоцненыя праверкі прыватнага аўтатранспарту, які ўязджае і выязджае. Забаронены перавоз птушкі і свойскай жывёлы.
У аэрапортах, на чыгуначных вакзалах і ў аўтобусных тэрміналах Уханя ўстаноўлены 35 стацыянарных і больш за 300 ручных цеплавых дэтэктараў. Асабліва правяраюць тых, хто пакідае горад з мэтай выезду за мяжу.
У КНР зафіксавана 224 выпадкі пнеўманіі, з іх чатыры - са смяротным зыходам.-0-
