21 кастрычніка, Мінск /Кар. БЕЛТА/. Літва, прэзідэнт якой у сакавіку заклікаў Украіну не браць электраэнергію з нядаўна адкрытай Беларускай АЭС, рэзка нарасціла спажыванне беларускай электраэнергіі. Аб гэтым паведаміў у сваім Telegram-канале дэпутат украінскай партыі "Слуга народа" Андрэй Герус, паведамляе інтэрнэт-газета "Страна.ua".
Андрэй Герус нагадаў, што 19 сакавіка прэзідэнт Літвы Гітанас Наўседа заклікаў Кіеў не купляць электраэнергію з БелАЭС. А ў маі імпарт электраэнергіі з Беларусі ва Украіну быў забаронены, прычым забарона дзейнічае да гэтага часу.
"Аднак сама Літва не стала забараняць пастаўкі беларускай электраэнергіі. Хоць па дакументах іх афармляюць як імпарт праз Латвію, фізічна ў Літву заходзіць электраэнергія з Беларусі. Міністр энергетыкі Літвы нават публічна прызнаваў, што краіна спажывае электрычнасць з Беларускай АЭС", - адзначыў Андрэй Герус.
На першым блоку Беларускай АЭС 4 кастрычніка завяршыўся рамонт, яго ўключылі ў сетку, а 12 кастрычніка энергаблок выйшаў на сваю магутнасць - 1170 МВт. І менавіта 4 кастрычніка пачалося рэзкае павелічэнне паставак электраэнергіі ў Літву, гаворыць Андрэй Герус. "Калі ў верасні яны былі на ўзроўні 100-300 МВт за гадзіну, то ў другой палове кастрычніка выйшлі на ўзровень большы за 500 МВт за гадзіну. А 19 кастрычніка быў максімальны паказчык за апошнія паўгода - 814 МВт за гадзіну беларускай электраэнергіі заходзіла ў Літву. Відавочна, што і цяпер у Літву значныя аб'ёмы электраэнергіі паступаюць з беларускай АЭС, супраць якой прыбалтыйская краіна так змагаецца", - заявіў Андрэй Герус.
Таксама, адзначае ўкраінскі дэпутат, у пачатку кастрычніка Літва ўдвая павялічыла імпарт электраэнергіі з Расіі (Калінінграда).
"Пасля забароны імпарту беларускай электраэнергіі ва Украіне рынак Балтыі стаў адзіным для Беларусі. Гэта, відавочна, узмацніла перагаворную пазіцыю пакупнікоў і па цане для балтыйскіх краін. Добры павучальны кейс. Думаю, у Літвы гэтай зімой будзе ўсё добра, без значных рызык дэфіцыту электраэнергіі", - рэзюмаваў Андрэй Герус.-0-
