19 мая, Мінск /Кар. БЕЛТА/. Амерыканская біятэхналагічная кампанія Moderna дала справаздачу аб паспяховых клінічных выпрабаваннях вакцыны ад новага каранавіруса. Адпаведная заява апублікавана на сайце фірмы, паведамляе ТАСС.
Удзельнікі клінічных выпрабаванняў былі падзелены на некалькі груп, ім уводзілі розныя дозы вакцыны. У тых, хто атрымліваў найменшую, антыцелы выпрацаваліся прыкладна ў той жа колькасці, што назіраецца ў людзей, якія перахварэлі на COVID-19. Пры гэтым у тых, хто атрымліваў вялікую дозу, антыцелаў у арганізме да заканчэння выпрабаванняў было выяўлена значна больш, чым у пацыентаў з каранавірусам пасля лячэння.
Выпрабаванні вакцыны пачаліся 16 сакавіка ў даследчым цэнтры ў Сіэтле (штат Вашынгтон). Яны праводзіліся сумесна кампаніяй Moderna і спецыялістамі нацыянальных інстытутаў аховы здароўя ЗША. У выпрабаваннях прымалі ўдзел 45 чалавек. "Каманда Moderna ў паскораным тэмпе працуе над тым, каб пачаць у ліпені трэці этап выпрабаванняў вакцыны і ў выпадку яго поспеху падаць заяўку на ліцэнзаванне", - сказаў кіраўнік кампаніі Стэфан Бансель.
У пачатку мая прэзідэнт ЗША Дональд Трамп заявіў, што спецыялісты ў ЗША, хутчэй за ўсё, створаць вакцыну ад каранавіруса да канца года. Раней дырэктар Нацыянальнага інстытута алергічных і інфекцыйных захворванняў ЗША Энтані Фаўчы заявіў, што амерыканская адміністрацыя разлічвае распрацаваць яе да студзеня 2021-га. Энтані Фаўчы падкрэсліў, што амерыканскія ўлады не могуць гарантаваць гэтага.
Акрамя Moderna выпрабаванні вакцыны ў ЗША вядуць кампаніі Inovio Pharmaceuticals і Pfizer, якая супрацоўнічае з германскай кампаніяй Biontech. Буйны вытворца фармацэўтычных сродкаў Johnson & Johnson плануе пачаць выпрабаванні сваёй вакцыны ў верасні.
Паводле інфармацыі ўніверсітэта Джонса Хопкінса, які праводзіць падлікі на аснове звестак федэральных і мясцовых улад, у ЗША зафіксавана больш за 1,48 млн выпадкаў заражэння каранавірусам. Памерлі 89,5 тыс. чалавек.-0-
