Сцяг Нядзеля, 21 ліпеня 2024
Усе навіны
Усе навіны
У свеце
02 красавіка 2024, 14:38

У выніку ўдару Ізраіля па Газе загінулі 7 супрацоўнікаў арганізацыі World Central Kitchen

Фота Reuters
Фота Reuters
2 красавіка, Мінск /Кар. БЕЛТА/. У выніку авіяцыйнага ўдару Ізраіля па сектары Газа загінулі як мінімум сем супрацоўнікаў дабрачыннай арганізацыі "Сусветная цэнтральная кухня" (World Central Kitchen, WCK). Аб гэтым паведаміў Хасэ Андрэс - заснавальнік арганізацыі, якая пасля трагічнага інцыдэнту аб'явіла аб прыпыненні работы ў анклаве, перадае BBC.

Сярод загінулых супрацоўнікаў WCK грамадзяне Аўстраліі, Вялікабрытаніі, Польшчы, а таксама ўладальнік двайнога грамадзянства ЗША і Канады і вадзіцель-палесцінец. Яны перамяшчаліся па сектары Газа на двух браніраваных аўтамабілях з лагатыпам WCK і яшчэ адным транспартным сродку, звярнулі ўвагу ў WCK.

Нягледзячы на каардынацыю дзеянняў з Арміяй абароны Ізраіля (ЦАХАЛ), канвой быў абстраляны ў час выезду са склада ў горадзе Дэйр-эль-Балах пасля разгрузкі звыш 100 т гуманітарнай харчовай дапамогі, якая прыбыла ў сектар Газа морам. Палесцінская крыніца паведаміла BBC, што супрацоўнікі WCK былі апрануты ў бронекамізэлькі з лагатыпам дабрачыннай арганізацыі.

Як лічаць у World Central Kitchen, гэта было "недаравальнае нападзенне". У WCK адзначылі, што прыпыняюць сваю дзейнасць і ў бліжэйшы час будзе прынята рашэнне аб будучым работы арганізацыі.

Іншая амерыканская няўрадавая арганізацыя, American Near East Refugee Aid (Anera), якая адыгрывае ключавую ролю ў забеспячэнні прадуктамі харчавання палесцінцаў, заявіла, што таксама замарожвае сваю дзейнасць у сектары Газа. Апошнія месяцы Anera цесна супрацоўнічала з World Central Kitchen. "Anera і WCK прыпыняюць нашу дзейнасць у Газе. Разам Anera і WCK забяспечваюць каля 2 млн абедаў у тыдзень у Газе", - сказаў генеральны дырэктар дабрачыннай арганізацыі Шон Кэрал.

Ізраільскія ваенныя заявілі, што праводзяць "дасканалае расследаванне" трагічнага інцыдэнту, каб зразумець яго акалічнасці. Прадстаўнік ЦАХАЛ контр-адмірал Даніэль Хагары выказаў "глыбокія спачуванні" ў сувязі з гібеллю сямі супрацоўнікаў гуманітарнай арганізацыі World Central Kitchen у Газе. Ізраільскія сілы цесна супрацоўнічаюць з WCK, каб дапамагчы ім у "выкананні іх дабрачыннай місіі" па дастаўцы дапамогі ў Газу, заявіў таксама Хагары і дадаў, што гэта арганізацыя была адной з першых няўрадавых арганізацый, якія прыбылі ў Ізраіль пасля 7 кастрычніка.

Прэм'ер-міністр Аўстраліі Энтані Альбанезэ паведаміў, што краіна мае намер дабівацца прыцягнення ўсіх вінаватых у тым, што адбылося, да "поўнай адказнасці".

Міністр адукацыі Вялікабрытаніі Джыліян Кіган адзначыла, што ўрад Вялікабрытаніі "вельмі занепакоены" паведамленнямі аб забойстве брытанскага супрацоўніка гуманітарнай арганізацыі ў сектары Газа.

Прадстаўнік Савета нацыянальнай бяспекі ЗША Эдрыен Уотсан заявіла, што Белы дом "прыгнечаны горам і глыбока занепакоены ўдарам". "Работнікі гуманітарных арганізацый павінны быць абаронены, паколькі яны дастаўляюць вельмі неабходную дапамогу, і мы заклікаем Ізраіль хутка расследаваць тое, што адбылося", - гаворыцца ў яе паведамленні ў сацсетках.

У Польшчы інфармавалі, што пачынаюць расследаванне па факце гібелі яе грамадзяніна пасля ўдару Ізраіля ў Газе. Знешнепалітычнае ведамства Польшчы склікала тэрміновую нараду ў сувязі з гібеллю грамадзяніна краіны ў выніку ўдару Ізраіля, расказаў прэс-сакратар ведамства Павел Вроньскі. МЗС Польшчы патрабуе ад Ізраіля афіцыйнага пацвярджэння інфармацыі аб тым, што паляк быў сярод супрацоўнікаў гуманітарных арганізацый, загінулых у час удару па сектары Газа.

7 кастрычніка 2023 года групоўка ХАМАС учыніла нападзенне на Ізраіль, забіўшы як мінімум 1200 ізраільцян і ўзяўшы больш за 200 у заложнікі. У адказ на нападзенне Ізраіль аб'явіў аб поўнай блакадзе Газы і стаў наносіць удары па Газе, пасля чаго аб'явіў аб пачатку наземнай аперацыі ў анклаве. Паводле даных органаў аховы здароўя ў анклаве, у выніку ўдараў Ізраіля ў Газе загінулі звыш 32,8 тыс. палесцінцаў, амаль дзве трэці з якіх - жанчыны і дзеці.-0-
Падпісвайцеся на нас у
Twitter
Топ-навіны
Свежыя навіны Беларусі