18 мая, Душанбэ /БЕЛТА - Хавар/. МУС Таджыкістана аб'явіла аб правядзенні на ўсходзе краіны антытэрарыстычнай аперацыі.
Адзначаецца, што 17 мая члены арганізаванай злачыннай групы незаконна перакрылі міжнародную аўтатрасу Душанбэ - Кульма на ўчастку аўтадарогі ў Рушанскім раёне, непасрэдна на лініі дзяржаўнай граніцы. У МУС рэспублікі заявілі, што іх дзеянні былі накіраваны на дэстабілізацыю грамадска-палітычнай сітуацыі ў краіне і былі супраць асноў канстытуцыйнага ладу.
Паводле даных ведамства, злачынцы мелі падтрымку міжнародных тэрарыстычных арганізацый і атрымлівалі за межамі краіны зброю і боепрыпасы. Акрамя таго, для ажыццяўлення тэрактаў і іншых форм правакацыі прыцягваліся замежныя наёмнікі.
Злачынныя групы адмовіліся выконваць патрабаванні супрацоўнікаў праваахоўных органаў аб здачы зброі і боепрыпасаў і аказалі ўзброенае супраціўленне.
Каб забяспечыць бяспеку грамадзян, грамадскі парадак і аднаўленнне бесперашкоднага руху транспартных сродкаў, праваахоўныя органы пачалі ў Рушанскім раёне краіны антытэрарыстычную аперацыю.-0-
