26 ліпеня, Мінск /Кар. БЕЛТА/. У сталіцу Туніса вечарам 25 ліпеня ўведзены падраздзяленні ўрадавай арміі, паведамляе ТАСС са спасылкай на тэлеканал Al Mayadeen.
Паводле інфармацыі, войскі занялі пазіцыі ў цэнтры горада, у прыватнасці побач з будынкам Асамблеі народных прадстаўнікоў (АНП, аднапалатны парламент) і штаб-кватэры нацыянальнай тэлекампаніі.
Меры прыняты ўслед за рашэннямі прэзідэнта Каіса Саіда, які аб'явіў аб прыпыненні дзейнасці АНП, адмене парламенцкай недатыкальнасці ўсіх дэпутатаў і адстаўцы прэм'ер-міністра Хішама Машышы.
Як паведамляе тэлеканал, работа АНП прыпынена на 30 дзён. Акрамя таго, прэзідэнт даў указанне забараніць паездкі для ўсіх дэпутатаў і шэрага дзяржаўных чыноўнікаў.
Тым часам старшыня АНП, лідар ісламісцкай партыі "Ан-Нахда" Рашыд Ганушы заклікаў тунісцаў "дзейнічаць мірна для аднаўлення дэмакратыі".
Рашэнні Каіса Саіда прыняты пасля таго, як у нядзелю ў шэрагу гарадоў Туніса адбыліся маніфестацыі, удзельнікі якіх запатрабавалі роспуску парламента, змены палітычнага рэжыму, а таксама прыцягнення да адказнасці тых, хто вінаваты ў пагаршэнні эпідэміялагічнай і сацыяльна-эканамічнай сітуацыі ў рэспубліцы.
Маніфестанты грамілі і палілі мясцовыя штабы ісламісцкай партыі "Ан-Нахда", чый лідар Рашыд Ганушы з'яўляецца старшынёй АНП. У горадзе Набела (паўночны ўсход Туніса) людзі ўступілі ў сутыкненні з паліцыяй, быў прыменены слёзатачывы газ.-0-