10 студзеня, Мінск /Кар. БЕЛТА/. Урад Швецыі ў сувязі з ростам захваральнасці на COVID-19 уводзіць новыя абмежавальныя меры, якія ўступяць у сілу 12 студзеня, паведамляе шведская грамадская тэлекампанія SVT.
Паводле слоў прэм'ер-міністра Магдалены Андэрсан, распаўсюджванне інфекцыі ў краіне знаходзіцца на гістарычна высокім узроўні. "Мы лічым, што сітуацыя патрабуе прыняцця мер па зніжэнні нагрузкі на ахову здароўя", - заявіла яна.
У адпаведнасці з новымі абмежаваннямі ўстановы грамадскага харчавання павінны будуць закрывацца не пазней за 23.00, пры гэтым колькасць чалавек у адной кампаніі не можа перасягаць восем чалавек. Для наведвання мерапрыемстваў з колькасцю ўдзельнікаў большай за 50 спатрэбіцца сертыфікат аб вакцынацыі. Для публічных сходаў і масавых мерапрыемстваў прапануецца максімальная колькасць удзельнікаў 500 чалавек. Універсітэтам рэкамендуецца дыстанцыйны фармат навучання.
5 студзеня ў Швецыі было зарэгістравана 23 877 выпадкаў заражэння каранавірусам. Гэта найбольшая колькасць заражэнняў за суткі з пачатку пандэміі.
Як паведамляе ТАСС, у снежні ў краіне ўжо быў уведзены шэраг рэстрыкцый. У рэстаранах абслугоўванне ажыццяўляецца толькі за сталамі, адлегласць паміж якімі не павінна быць меншай за адзін метр. Пры паездках на паяздах і аўтобусах далёкага накіравання абавязкова браніраванне месцаў. Усім дарослым рэкамендавана пазбягаць масавага скопішча людзей і выкарыстоўваць ахоўныя маскі ў грамадскім транспарце.-0-
