19 студзеня, Мінск /Кар. БЕЛТА/. Чуткі аб тым, што амікрон - гэта апошні варыянт COVID-19 і пандэмія з ім скончыцца, не адпавядаюць сапраўднасці: пры цяперашнім узроўні распаўсюджвання нічога выключаць нельга. Аб гэтым заявіла прадстаўніца СААЗ, адказваючы на пытанні журналістаў на брыфінгу, паведамляецца на сайце Цэнтра навін ААН.
"Амікрон, магчыма, у сярэднім і выклікае менш цяжкія формы інфекцыі, аднак памылкова лічыць яго менш небяспечным. Такое стаўленне негатыўна ўплывае на меры па барацьбе з пандэміяй і можа каштаваць нам страчаных жыццяў", - папярэдзіў генеральны дырэктар СААЗ Тэдрас Гебрэесус.
Паводле яго слоў, амікрон здольны прыводзіць да шпіталізацыі і смяротнага выніку. Для многіх краін, як адзначаюць у СААЗ, наступны тыдзень будзе крытычным - стане зразумела, ці справілася сістэма аховы здароўя з узрослай нагрузкай, звязанай з распаўсюджваннем больш заразнага варыянту.
Паводле даных СААЗ, за апошні тыдзень колькасць новых выпадкаў COVID-19 вырасла на 20 працэнтаў - за мінулыя сем дзён захварэлі 19 млн чалавек. У СААЗ нагадваюць, што гэтыя лічбы адлюстроўваюць толькі афіцыйна зарэгістраваныя выпадкі, а рэальная колькасць можа быць намнога вышэйшай. Паказчык смяротнасці застаўся без змяненняў і склаў прыкладна 45 тыс.
"У некаторых краінах пік захваральнасці, магчыма, пройдзены, і гэта ўсяляе надзею на тое, што горшае ў мінулым. Але ніводная краіна яшчэ не можа лічыць, што небяспека прайшла", - адзначыў кіраўнік СААЗ. Асаблівы неспакой у яго выклікае сітуацыя ў краінах з нізкім ахопам вакцынацыяй.
У ходзе брыфінгу таксама ўзнімалася пытанне адносна небяспекі заражэння каранавіруснай інфекцыяй дамашніх жывёл. "Мы разумеем, што шэраг жывёл могуць быць інфіцыраваны SARS-CoV-2, - адзначыла вядучы эпідэміёлаг СААЗ Марыя ван Керкхове. - І, зразумела, такая магчымасць ёсць, мы называем гэта "адваротным заанозам". Потым жывёлы могуць зноў заражаць людзей. Рызыка такога развіцця падзей нізкая, але мы пастаянна назіраем за гэтым".-0-
