15 лютага, Мінск /Кар. БЕЛТА/. Цэнтральны навукова-даследчы інстытут эпідэміялогіі Расспажыўнагляду распрацаваў і зарэгістраваў першую ў свеце тэст-сістэму для выяўлення брытанскага штама COVID-19. Аб гэтым паведамляе ТАСС са спасылкай на ведамства.
"Новая тэст-сістэма хутка выяўляе наяўнасць менавіта мутантнага штама, што рэалізавана за кошт асаблівага падбору алігануклеатыдаў для эфектыўнай ампліфікацыі брытанскай мутацыі, і разлічана на максімальную канцэнтрацыю віруса. Гэта дае магчымасць пазбегнуць ілжэдадатных вынікаў пры выяўленні мутацыі для узораў з вельмі высокай віруснай нагрузкай", - гаворыцца ў паведамленні.
Удакладняецца, што набор рэагентаў паспяхова прайшоў клінічныя выпрабаванні і зарэгістраваны для выкарыстання ў Расіі, а таксама мае высокую дакладнасць, што даказана выпрабаваннямі на клінічных узорах з пацверджанай мутацыяй.
"Новую тэхналогію можна выкарыстоўваць для распрацоўкі рэагентаў па выяўленні любых іншых мутацый SARS-CoV-2, а таксама іншых інфекцыйных узбуджальнікаў, дзе патрэбна хуткае масавае тэсціраванне (пандэмічныя інфекцыі)", - паведамляе ведамства.-0-