16 сакавіка, Мінск /Кар. БЕЛТА/. Публікацыя Bloomberg аб тым, што ўлады Індыі следам за краінамі Захаду ўвялі паталок цэн на імпартуемую з Расіі нафту, не адпавядае рэчаіснасці. Аб гэтым заявіў расійскі пасол у Індыі Дзяніс Аліпаў, паведамляе ТАСС.
Раней Bloomberg, спасылаючыся на крыніцы, паведаміў, што індыйскія ўлады вырашылі далучыцца да краін Захаду адносна штучнага абмежавання цэн на нафту з Расіі.
Паводле слоў Аліпава, артыкул Bloomberg з'яўляецца інфармацыйным укідам. Пры гэтым такія публікацыі ў СМІ з'яўляліся і раней. Дыпламат падкрэсліў, што Індыя не далучалася да механізма цэнавага абмежавання на нафту і не раз выказвала сумненні ў эфектыўнасці гэтай ініцыятывы.
Аліпаў таксама адзначыў, што індыйскія ўлады выбудоўваюць эканамічную палітыку зыходзячы з інтарэсаў краіны. Яны не кіруюцца ўстаноўкамі Захаду. Пасол лічыць, што Індыя будзе закупляць нафту ў РФ да таго часу, пакуль гэта прыносіць ёй выгаду.
Індыя, нараўне з КНР і ЗША, уваходзіць у тройку найбуйнейшых імпарцёраў нафты ў свеце. Яна таксама ўваходзіць у лік асноўных імпарцёраў расійскай нафты.
Улады Індыі з самага пачатку не падтрымалі ініцыятыву Захаду аб увядзенні ліміту цэн на нафту з РФ. Паводле слоў міністра нафты і прыроднага газу краіны Хардзіпа Сінгха Пуры, нафта не мае кляйма якой-небудзь дзяржавы, і Нью-Дэлі будзе і далей праводзіць незалежную палітыку для забеспячэння ўласнай энергабяспекі.-0-
