7 чэрвеня, Мінск /Кар. БЕЛТА/. У Польшчы сёння пройдзе маштабная забастоўка медсясцёр і акушэрак, якая закране каля 40 бальніц па ўсёй краіне, паведамляе польскі інфармацыйны партал радыё RMF FM.
Паводле слоў старшыні Нацыянальнага прафсаюза медсясцёр і акушэрак Польшчы Хрысціны Пток, медсёстры незадаволены ўмовамі працы і патрабуюць павышэння зарплат.
Падставай для забастоўкі стаў закон аб парадку вызначэння мінімальнай базавай заработнай платы некаторых катэгорый медыцынскіх работнікаў. Паводле слоў Хрысціны Пток, новы закон не гарантуе стабільных прынцыпаў павышэння базавай заработнай платы медсясцёр і акушэрак, "нягледзячы на шматлікія сігналы ад членаў прафсаюзнай арганізацыі аб значным пагаршэнні ўмоў працы і аплаты, шматмесячным стрэсе, знясіленні і эмацыянальным выгаранні".
Хрысціна Пток адзначыла, што сённяшняя забастоўка папераджальная і будзе доўжыцца дзве гадзіны. Запланаваны таксама акцыі салідарнасці і дэманстрацыі перад бальніцамі ў Варшаве, Беластоку, Кракаве, Любліне, Лодзі, Ольштыне, Жэшуве і іншых гарадах. Калі ўлады не задаволяць патрабаванні пратэстуючых, "некалькі соцень бальніц гатовы да другой хвалі папераджальных забастовак".-0-
