24 студзеня, Мінск /Кар. БЕЛТА/. Камітэт аховы здароўя Пекіна аб'явіў у горадзе вышэйшы ўзровень рэагавання на пагрозу грамадскаму здароўю ў сувязі з распаўсюджваннем каранавіруса, паведамляе ТАСС са спасылкай на старшыню камітэта Лэй Хайчаа.
Паводле апошніх даных, у Пекіне пнеўманіяй новага тыпу захварэлі 29 чалавек, адзін з іх знаходзіцца ў цяжкім стане.
Як растлумачыў Лэй Хайчаа, у сталіцы КНР будуць прыняты надзвычайныя меры па процідзеянні распаўсюджванню захворвання. У горадзе ўжо закрыты вялікія культурныя ўстановы, адменены публічныя мерапрыемствы з нагоды свята Вясны - Новага года па ўсходнім календары.
Вышэйшы ўзровень рэагавання раней быў аб'яўлены ў кітайскай правінцыі Хубэй (насельніцтва амаль 59,2 млн чалавек). Успышка пнеўманіі новага тыпу, выкліканая каранавірусам 2019-nCoV, адбылася ў горадзе Ухань.
Між тым у Сусветнай арганізацыі аховы здароўя (СААЗ) заявілі, што ўспышка каранавіруса ў Кітаі не з'яўляецца "надзвычайнай сітуацыяй міжнароднага значэння". Генеральны дырэктар СААЗ прызнаў, што пакуль многія фактары, звязаныя з гэтым вірусам, невядомы. "Мы яшчэ не разумеем, наколькі лёгка ён распаўсюджваецца, і не да канца разумеем яго клінічныя асаблівасці або ступень цяжару інфекцыі. СААЗ працуе кругласутачна з нашымі партнёрамі ў Кітаі і іншымі краінамі на рэгіянальным узроўні і ў штаб-кватэры з тым, каб як мага хутчэй устараніць прабелы ў нашых ведах", - сказаў кіраўнік СААЗ.
Ён падкрэсліў, што ў СААЗ сочаць за ўспышкай і працуюць над тым, як прадухіліць перадачу віруса ад чалавека да чалавека.
Паводле апошніх даных, у Кітаі пнеўманіяй новага тыпу захварэлі 849 чалавек, зарэгістравана 26 смяротных зыходаў. Каранавірус ужо выяўлены ў В'етнаме, Рэспубліцы Карэя, ЗША, Сінгапуры і Японіі.-0-
