20 студзеня, Пекін /БЕЛТА - Сіньхуа/. У Пекіне тэрмін нагляду за станам здароўя асоб, якія прыязджаюць з-за мяжы, складзе 28 дзён. Такая мера павінна садзейнічаць прадухіленню завозу COVID-19, паведамілі сталічныя ўлады.
Новая мадэль "14+7+7" прадугледжвае 14-дзённы цэнтралізаваны медыцынскі каранцін, адзін тыдзень дамашняй самаізаляцыі або цэнтралізаванага каранціну, а таксама яшчэ адзін тыдзень назірання за станам здароўя.
Асобы, якія прыбываюць з-за мяжы і маюць намер трапіць у Пекін праз іншыя гарады Кітая, павінны пачакаць 21 дзень, перш чым ехаць у сталіцу. Пасля таго як яны трапяць у Пекін, за станам іх здароўя будуць сачыць на працягу сямі дзён.
На працягу сямі дзён медыцынскага нагляду грамадзяне могуць весці звыклае жыццё, пазбягаючы пры гэтым скопішча людзей. Ім таксама рэкамендуецца рэгулярна паведамляць пра свой стан мясцовым органам улады.
За мінулыя суткі ў Пекіне было зарэгістравана сем новых пацверджаных выпадкаў лакальнага заражэння COVID-19. Цяпер вядуцца эпідэміялагічныя расследаванні. Усяго ў кантынентальнай частцы Кітая 19 студзеня было зафіксавана 103 новыя пацверджаныя выпадкі заражэння COVID-19: 88 лакальных і 15 завезеных з-за мяжы.-0-
