10 жніўня, Мінск /Кар. БЕЛТА/. Сама меней 64 чалавекі сталі ахвярамі мусонных дажджоў і паводак ў Пакістане за апошнія трое сутак, паведамляе ТАСС.
Паводле даных пакістанскага Нацыянальнага ўпраўлення па барацьбе з наступствамі стыхійных бедстваў, найбольшая колькасць загінулых - у паўночна-заходняй правінцыі Хайбер-Пахтунхва. У рэгіёне парушана сувязь з затопленымі раёнамі, разліў рэк знішчыў сотні жылых дамоў, выклікаў абрушэнне мастоў і апор высакавольтных ліній электраперадачы.
У паўднёвай правінцыі Сінд прарыў плаціны на адным з каналаў прывёў да чалавечых ахвяр і затаплення некалькіх вёсак. Да эвакуацыі мясцовых жыхароў былі прыцягнуты армейскія падраздзяленні і верталёты. У зоне бедства ваенныя разгарнулі мабільны шпіталь, дзе аказваецца дапамога пацярпелым.
Дажджы паралізавалі нармальнае жыццё ў буйных пакістанскіх гарадах Карачы і Лахор. Вуліцы мегаполісаў затоплены вадой, паводка значна ўскладніла работу транспарту і гарадскіх службаў.-0-