31 жніўня, Мінск /Кар. БЕЛТА/. Міністэрства аховы здароўя Новай Зеландыі пацвердзіла: у канцы чэрвеня выяўлены новы штам каранавіруса С.1.2 з павышанай ступенню мутацыі. Аб гэтым паведаміла выданне The New Zealand Herald са спасылкай на прадстаўніка ведамства, інфармуе ТАСС.
Паводле даных выдання, мужчына, у якога выяўлены штам C.1.2, адразу пасля прылёту з-за мяжы быў змешчаны ў дзяржаўны ізалятар, што дало магчымасць пазбегнуць распаўсюджвання віруса. "Усе штамы каранавіруса, якія выклікаюць апасенні, кантралююцца Міністэрствам аховы здароўя. Гэта адна з прычын, па якіх мы правяраем паслядоўнасці геному віруса ва ўсіх станоўчых узорах", - цытуе выданне прэс-сакратара міністэрства.
Новы штам каранавіруса, які атрымаў назву C.1.2, быў ідэнтыфікаваны спецыялістамі паўднёваафрыканскага Нацыянальнага інстытута інфекцыйных захворванняў. Паводле даных вучоных, новы штам можа мець павышаную агрэсіўнасць пры адначасовай больш высокай устойлівасці да вакцын. Найноўшыя даследаванні паказваюць, што С.1.2 пранік ужо ў Дэмакратычную Рэспубліку Конга, Кітай, Новую Зеландыю, Вялікабрытанію, Партугалію, Швейцарыю і Маўрыкій.
Улады Новай Зеландыі закрылі краіну на каранцін з 17 жніўня. Усе прадпрыемствы, установы і ведамствы былі закрыты, грамадскія мерапрыемствы адменены, а школы і вышэйшыя навучальныя ўстановы пераведзены на дыстанцыйнае навучанне. Грамадзянам прадпісана заставацца дома, а на вуліцы і ў грамадскіх месцах захоўваць сацыяльную дыстанцыю 2 м і надзяваць маску. За час успышкі ў краіне выявілі 612 заражаных дэльта-штамам каранавіруса, 49 з іх, у тым ліку шэсць дзяцей ва ўзросце да года, - за апошнія суткі.-0-
