24 снежня, Мінск /Кар. БЕЛТА/. Расія апасаецца, што Захад можа ўчыніць правакацыю ў Беларусі ў час рэферэндуму па Канстытуцыі рэспублікі, заявіў у інтэрв'ю РІА Навіны дырэктар Другога дэпартамента краін СНД МЗС Расіі Аляксей Палішчук.
"Такія апасенні, вядома, ёсць. Дэстабілізаваць сітуацыю, учыніць каляровую рэвалюцыю, устанавіць уласны кантроль над абстаноўкай - гэта добра апрабаваная тактыка Захаду. Праз экспарт дэмакратыі ён асвойвае новыя тэрыторыі, пашырае сферу свайго ўплыву", - сказаў Аляксей Палішчук.
"Паглядзіце, якія грошы выдзяляюцца беларускім палітэмігрантам, як і хто каардынуе іх дзейнасць, якія "гастролі" арганізуюць іх лідарам, на якім узроўні іх прымаюць. У Літве, дзе далі прытулак штабу Ціханоўскай, ужо гучаць абурэнні наконт расходаў на яго ўтрыманне", - дадаў субяседнік агенцтва.
Масква спадзяецца, што канстытуцыйная рэформа ў Беларусі дасць магчымасць кансалідаваць беларускае грамадства. "Што датычыцца канстытуцыйнай рэформы ў Беларусі, то мы чакаем, што яна дасць магчымасць мадэрнізаваць палітычнае ўпарадкаванне краіны і кансалідаваць беларускае грамадства. Улады краіны прыкладаюць да гэтага вялікія намаганні. Робяць усё, каб пераўтварэнні ажыццяўляліся ў рамках прававога поля", - сказаў Аляксей Палішчук.
Паводле яго слоў, каляровыя рэвалюцыі і майданныя перавароты ні да чаго добрага не прыводзяць, а іх наступствы даводзіцца разграбаць дзесяцігоддзямі.
"Спадзяёмся, што канстытуцыйны рэферэндум у Беларусі пройдзе максімальна адкрыта і дасць грамадзянам магчымасць свабодна выказаць сваю волю. У народа Беларусі дастаткова мудрасці, каб без падказак, умяшання і націску звонку вызначыцца ў тым, куды рухацца далей", - дадаў Аляксей Палішчук.-0-
