3 снежня, Мінск /Кар. БЕЛТА/. Урачысты саміт кіраўнікоў дзяржаў і ўрадаў НАТА, на якім будзе адзначацца 70-годдзе з моманту стварэння Альянсу, адкрываецца сённяў у Лондане, паведамляе ТАСС.
У афіцыйным парадку дня 3 снежня - увечары ўрачыстая вячэра, а 4 снежня раніцай пройдзе адзінае рабочае пасяджэнне працягласцю дзве гадзіны. Гэта значыць, што на выступленне за круглым сталом кожнага з лідараў 29 краін Альянсу і генеральнага сакратара НАТА адведзена не больш за чатыры мінуты.
Сярод тэм для абмеркавання - пытанні размеркавання абаронных расходаў і забеспячэнне еўрапейскай бяспекі ў святле спынення дзеяння Дагавора аб ліквідацыі ракет сярэдняй і меншай далёкасці. Лідары прымуць таксама некалькі фармальных пастаноў: зацвердзяць на вышэйшым узроўні рашэнне міністэрскай сустрэчы НАТА 22 лістапада аб прызнанні космасу адной са сфер аперацыйнай дзейнасці Альянсу нараўне з сушай, морам, паветранай і кіберпрасторамі. Зрэшты, НАТА абяцае не размяшчаць у космасе зброю, а выкарыстоўваць гэта асяроддзе для сувязі і назірання - у прыватнасці, для патрэб сістэм проціпаветранай абароны і проціракетнай абароны.
Саміт быў задуманы як вельмі кампактнае па часе ўрачыстае мерапрыемства. На практыцы ж лідары вядучых краін НАТА вязуць з сабой мноства праблем і ўзаемных прэтэнзій, у большай ступені фінансавага плана.
Днём стварэння НАТА лічыцца 4 красавіка 1949 года, калі быў падпісаны асноватворны Вашынгтонскі дагавор.-0-