12 лістапада, Мінск /Кар. БЕЛТА/. Нягледзячы на рэзкі рост захваральнасці на каранавірусную інфекцыю ў Еўропе, смяротнасць у параўнанні з канцом 2020 года, калі пачалася масавая вакцынацыя ад кавіду, знізілася ў дзясяткі разоў у тых краінах, дзе калектыўны імунітэт перасягнуў 70 працэнтаў. Аб гэтым сведчаць падлікі ТАСС на аснове афіцыйных заяў улад, даных Сусветнай арганізацыі аховы здароўя, а таксама высноў экспертаў і СМІ.
Захваральнасць - на максімуме, смяротнасць - на мінімуме
Тэмпы распаўсюджвання інфекцыі ў Еўропе падскочылі апошнія тры тыдні. Практычна ўвесь рэгіён зноў апынуўся ў чырвонай зоне. У Германіі, Аўстрыі, Венгрыі, краінах Балтыі і шэрагу балканскіх дзяржаў цяпер за суткі рэгіструюць самую высокую за пандэмію колькасць новых выпадкаў заражэння. Аднак там, дзе высокі ўзровень калектыўнага імунітэту, смяротнасць апусцілася да самых нізкіх значэнняў.
Самая высокая ў Еўропе захваральнасць захоўваецца ў Вялікабрытаніі, дзе з ліпеня рэгіструюць звыш 30 тыс. хворых у дзень. Пры гэтым паміраюць менш за 1 працэнт з іх - каля 200 чалавек за суткі. На піку ў мінулую хвалю ў студзені гэты паказчык быў у дзевяць разоў вышэйшы, а кавід рэгістравалі ў 56,3 тыс. чалавек. Цяпер узровень калектыўнага імунітэту ў краіне складае каля 74 працэнтаў.
На другое месца ў апошнія дні выйшла Германія, дзе колькасць захварэўшых за суткі перасягнула 45 тыс., хоць імунітэт у краіне наблізіўся да адзнакі 70 працэнтаў. Такіх высокіх значэнняў захваральнасці ў ФРГ яшчэ не было. Мінулай зімой яны крыху перавышалі 30 тыс., але тады смяротнасць дасягала 1,2 тыс. выпадкаў за суткі, цяпер жа ад кавіду паміраюць каля 150 чалавек. Паводле слоў кіраўніка Міністэрства аховы здароўя ФРГ Енса Шпана, цяпер у краіне ідзе "пандэмія непрышчэпленых".
Паміраюць адзінкі
Па долі вакцынаванага насельніцтва на першым месцы ў Еўропе Мальта (97,8 працэнта) і Партугалія (88,6 працэнта). Прычым на Мальце пік захваральнасці адзначаўся гэтай вясной, цяпер жа кавід рэгіструюць прыкладна ў 50 чалавек за суткі, а за кастрычнік памерлі ўсяго чатыры чалавекі. У Партугаліі смяротнасць крыху вышэйшая (не больш за 10 выпадкаў за суткі), але і хварэюць больш - кавід штодзень дыягнастуюць прыкладна ў 1,3 тыс. чалавек. У студзені гэты паказчык быў у 12 разоў большы, а смяротнасць перасягала цяперашнюю амаль у 30 разоў.
У Іспаніі, дзе імунітэт перавысіў ужо 81,5 працэнта, захваральнасць крыху вырасла - цяпер за суткі рэгіструюць каля 3 тыс. новых выпадкаў, хоць у пачатку кастрычніка іх было ў 2 разы менш, але ў студзені штодзень заражаліся адразу па 30 тыс. чалавек. Смяротнасць жа ў Іспаніі ў апошнія тыдні, у адрозненне ад захваральнасці, зніжаецца. Калі ў канцы верасня паміралі больш за 50 чалавек за суткі, цяпер - каля 30. Але больш за ўсё іх было ў самую першую хвалю - тады за суткі рэгістравалі каля 1 тыс. смяротных выпадкаў.
Падобная сітуацыя складваецца ў Францыі (78,8 працэнта прышчэпленых) і ў Італіі (77,4 працэнта). У першай за апошні месяц колькасць выпадкаў заражэння за суткі вырасла з 5 тыс. да 12 тыс., а ў другой - з 3 тыс. да 7,8 тыс. Але гэта ўсё роўна ў разы менш, чым было мінулай восенню і зімой. А паміраюць цяпер не больш як 1 працэнт хворых.
Смяротнасць расце
Пры гэтым у краінах Усходняй Еўропы, дзе ўзровень калектыўнага імунітэту не перавышае 40 працэнтаў, смяротнасць дасягнула самых высокіх за пандэмію паказчыкаў.
Так, ва Украіне штодзень паміраюць ужо больш за 800 чалавек за суткі, у Румыніі - каля 500. У Балгарыі рэгіструюць каля 300 смяротных выпадкаў, што складае 7,5 працэнта ад колькасці хворых. Выключэннем з'яўляецца Латвія, дзе прышчэплены ўжо больш за 60 працэнтаў насельніцтва, але кожны дзень паміраюць прыкладна 6 працэнтаў інфіцыраваных.-0-
