13 мая, Мінск /Кар. БЕЛТА/. У Кітаі за мінулыя суткі зафіксавана сем новых выпадкаў інфіцыравання каранавірусам - шэсць мясцовых і адзін увезены, паведамляе ТАСС са спасылкай на заяву Дзяржаўнага камітэта па пытаннях гігіены і аховы здароўя КНР.
Шэсць новых выпадкаў былі зафіксаваны ў горадзе Цзілінь. Яшчэ ў аднаго чалавека ў гэтым рэгіёне падазраецца інфіцыраванне каранавірусам, аднак яго дыягназ пакуль не пацверджаны. Цэнтральнае тэлебачанне Кітая паведаміла, што ўлады часткова абмежавалі чыгуначныя зносіны з гэтым горадам пасля зафіксаваных новых выпадкаў.
Каля 367 чалавек, якія кантактавалі з хворымі, ізаляваны і знаходзяцца пад кантролем медыкаў. Новы ўвезены з-за мяжы выпадак заражэння выяўлены ў Шанхаі.
Паводле апошніх даных, агульная колькасць пацверджаных выпадкаў заражэння каранавірусам у Кітаі дасягнула 82926, выздаравелі 78189 чалавек, памерлі 4633. У Кітаі налічваецца ў агульнай колькасці 104 актыўныя выпадкі лячэння ад каранавіруса, стан 10 пацыентаў ацэньваецца як цяжкі.-0-
