25 сакавіка, Мінск /Кар. БЕЛТА/. У Кітаі за мінулыя суткі зафіксаваны 47 новых выпадкаў інфіцыравання - усе заражаныя прыбылі з-за мяжы, паведамляе ТАСС са спасылкай на Дзяржкамітэт па пытаннях гігіены і аховы здароўя КНР.
У заяве ведамства сказана, што найбольшая колькасць была выяўлена ў Шанхаі (19), Пекіне (5) і правінцыі Гуандун (5).
Агульная колькасць завозных выпадкаў інфіцыравання ў краіне вырасла да 474. Напярэдадні, 24 сакавіка, афіцыйны прадстаўнік МЗС Гэн Шуан адзначаў 427 завозных выпадкаў (380 у грамадзян Кітая і 47 у іншаземцаў) за ўвесь час эпідэміі.
Ад захворвання, выкліканага новым каранавірусам, у Кітаі да гэтага моманту вылечыліся 73,7 тыс. чалавек, з іх 491 пацыент быў выпісаны з медустановы за мінулыя суткі. Таксама за 24 сакавіка ў краіне зафіксавана чатыры новыя выпадкі лятальнага канца. Агульная колькасць тых, хто захварэў, перасягнула 81,2 тыс., каля 3,3 тыс. памерлі. У медустановах застаюцца 4,3 тыс. чалавек, з іх каля 1,4 тыс. знаходзяцца ў цяжкім стане.
У суседнім Тайландзе, паводле інфармацыі міністэрства аховы здароўя каралеўства, за суткі зарэгістравана 107 новых выпадкаў заражэння каранавірусам. Агульная колькасць пацверджаных фактаў захворвання, выкліканага каранавірусам новага тыпу, дасягнула 934, вылечыліся 70 чалавек. Таксама ў краіне зафіксаваны чатыры выпадкі лятальнага канца.
Між тым, прадстаўнік СААЗ Маргарэт Харыс заявіла, што ЗША патэнцыяльна могуць стаць новым эпіцэнтрам распаўсюджвання каранавіруса. У краіне, паводле даных універсітэта Джонса Хопкінса, колькасць выпадкаў заражэння каранавірусам перасягнула ўжо 55 тыс., за суткі памерла 200 пацыентаў, а ўсяго ахвяр захворвання - больш як 790 чалавек. Вылечыліся 348 інфіцыраваных.
У Еўропе эпіцэнтрам хваробы, выкліканай каранавірусам COVID-19, застаецца Італія - яна лідар і па захваральнасці, і па смяротнасці. У краіне памерлі 6820 чалавек, амаль 70 тыс. інфіцыраваных. Напярэдадні кіраўнік Дэпартамента грамадзянскай абароны Італіі Анджэла Барэлі паведаміў пра 743 памерлых за апошнія суткі ад захворвання, выкліканага каранавірусам, і яго наступстваў. Колькасць тых, хто паправіўся, павялічылася на 894 да 8326 чалавек. Але ў цэлым тэмпы распаўсюджвання інфекцыі крыху зніжаюцца.
У Расіі на сённяшні дзень зарэгістравана 495 выпадкаў захворвання. Паправіліся і былі выпісаны 22 пацыенты.
Агульная колькасць заражэнняў каранавірусам COVID-19 у свеце, паводле даных універсітэта Джона Хопкінса, перасягнула 422 тыс. чалавек, 18 901 памерлі, вылечыліся больш за 100 тыс. чалавек.
Успышка выкліканага новым каранавірусам захворвання была зафіксавана ў канцы 2019 года ў Цэнтральным Кітаі, пазней яна распаўсюдзілася больш як на 180 краін і была прызнана Сусветнай арганізацыяй аховы здароўя пандэміяй.-0-
