27 снежня, Мінск /Кар. БЕЛТА/. Кітайскія вучоныя распрацавалі штучны інтэлект (ШІ), які здольны прад'явіць абвінавачанне з дакладнасцю 97 працэнтаў на аснове вуснага апісання справы. Аб гэтым піша газета South China Morning Post.
Новую тэхналогію пратэсціравалі ўжо ў народнай пракуратуры раёна Пудун у Шанхаі. Вучоныя ўпэўнены, што гэта тэхналогія дапаможа знізіць паўсядзённую нагрузку на пракурораў, дазваляючы ім засяродзіцца на больш складаных задачах.
ШІ атрымаў неабходныя навыкі пасля вывучэння больш як 17 тыс. спраў, разгледжаных у судах Шанхая з 2015 па 2020 год. Цяпер ён можа ідэнтыфікаваць і выстаўляць абвінавачанні па такіх распаўсюджаных злачынствах у Шанхаі, як махлярства з крэдытнымі карткамі, арганізацыя азартных гульняў, небяспечнае ваджэнне, наўмыснае нанясенне траўмаў, стварэнне перашкод прадстаўнікам улады ў выкананні службовых абавязкаў, крадзеж, махлярства. Вучоныя ўпэўнены, што ў будучым ШІ зможа выносіць абвінавачанні і па больш рэзанансных злачынствах.
Кітай першым у свеце стаў прымяняць тэхналогіі ШІ ў рабоце пракуратуры. У 2016 годзе ў краіне пачалося выкарыстанне тэхналогіі, вядомай як Сістэма-206, якая здольна ацаніць доказы, умовы арышту і вызначыць, наколькі падазроны ў злачынстве можа аказацца небяспечным для грамадства.-0-
