9 верасня, Мінск /Кар. БЕЛТА/. Улады Кітая часова перасталі выдаваць дазволы на выпуск новых анлайн-гульняў, паведамляе газета South China Morning Post.
Такое рашэнне было прынята ў рамках кампаніі па барацьбе з гульнявой залежнасцю сярод моладзі. Урад Кітая мае намер скараціць колькасць новых гульняў у краіне, якая з'яўляецца буйнейшым у свеце галіновым рынкам.
Раней улады КНР прынялі рашэнне забараніць непаўналетнім гуляць у анлайн-гульні больш за 3 гадзіны ў тыдзень. Асобам да 18 гадоў дазволена гуляць у анлайн-гульні на працягу адной гадзіны з 20.00 да 21.00 па пятніцах, выхадных і святочных днях.-0-
