22 сакавіка, Нанкін /БЕЛТА - Сіньхуа/. У выніку ўзрыву, што адбыўся 21 сакавіка на заводзе кампаніі хімічнай прамысловасці ва ўсходняй кітайскай правінцыі Цзянсу, загінулі 44 чалавекі. Аб гэтым паведамілі мясцовыя ўлады.
Паводле інфармацыі ТАСС, бальніцы ў раёне горада Яньчэн прынялі каля 640 пацярпелых. У іх лік уключаны тыя, каго даставілі ў бальніцы на машынах хуткай дапамогі, і тыя, хто звярнуўся ў медустановы самастойна з лёгкімі раненнямі. Вядома, што 32 чалавекі знаходзяцца ў крытычным стане, яшчэ 58 чалавек атрымалі цяжкія раненні.
Узрыў прагрымеў на прадпрыемстве кампаніі "Цзянсу цяньцзяі" ў хімічным прамысловым парку. Гэты ўзрыў быў настолькі моцны, што сейсмалагічнае ўпраўленне краіны зафіксавала ў гэтым раёне землетрасенне магнітудай 3. Ударнай хваляй выбіла шкло ў дамах, размешчаных у радыусе амаль 5 км ад месца ЧП.
Паводле афіцыйнай заявы ўлад, пацярпелы ў час узрыву генеральны дырэктар кампаніі Чжан Ціньюэ знаходзіцца пад вартай у бальніцы. Затрымана яшчэ некалькі чалавек з ліку менеджменту прадпрыемства.-0-