16 лістапада, Мінск /Кар. БЕЛТА/. Не менш за 275 чалавек, у тым ліку 50 дзяцей, аказаліся ў пастцы на аўтамабільнай трасе ў горнай мясцовасці ў правінцыі Брытанская Калумбія з-за апоўзняў, выкліканых праліўнымі дажджамі, паведамляе ТАСС са спасылкай на тэлеканал CBC.
Паводле яго інфармацыі, цяпер ідзе выратавальная аперацыя з прыцягненнем верталётаў Узброеных Сіл Канады. Паводле папярэдніх даных, на гэтым участку трасы могуць знаходзіцца да 100 аўтамабіляў.
Раней паведамлялася, што два вялікія апоўзні вечарам 14 лістапада перакрылі рух на адным з участкаў аўтатрасы ў раёне горада Агасіс, які знаходзіцца за 97 км на ўсход ад Ванкувера. Пакуль ратавальнікам удалося вывезці 14 чалавек, некалькі з іх былі дастаўлены ў бальніцу. Інфармацыі аб ахвярах не паступала.
У Брытанскай Калумбіі за апошнія суткі ўжо выпала 230 мм ападкаў у выглядзе дажджу, што складае амаль месячную норму. Паводле даных сіноптыкаў, да канца 15 лістапада можа выпасці ўвогуле да 300 мм ападкаў. У сувязі з гэтым у рэгіёне фіксуюцца масавыя падтапленні, частка жыхароў вымушана пакінуць свае дамы. Месцамі парушаны аўтамабільныя і чыгуначныя зносіны.-0-
