22 ліпеня, Мінск /Кар. БЕЛТА/. Больш за 3 тыс. чалавек былі эвакуіраваны ў заходняй канадскай правінцыі Брытанская Калумбія з-за працяглых лясных пажараў, паведамляе ТАСС са спасылкай на тэлеканал CBS.
Яшчэ 16 тыс. домашніх гаспадарак могуць атрымаць загад на эвакуацыю ў бліжэйшы час. У аўторак улады рэгіёна на фоне лясных пажараў увялі ў правінцыі рэжым надзвычайнай сітуацыі.
Цяпер у Брытанскай Калумбіі зафіксавана каля 300 лясных пажараў. У ліквідацыі ўзгарання ўдзельнічаюць 3,1 тыс. чалавек, у тым ліку пажарныя з правінцый Альберта, Квебек і Нью-Брансуік, а таксама канадскія ваеннаслужачыя. У выхадныя ў рэгіён павінны прыбыць з розных частак Канады яшчэ 500 пажарных, а таксама 100 пажарных з Мексікі. Да тушэння агню прыцягнуты 178 верталётаў і самалётаў.
Распаўсюджванню агню спрыяе моцны вецер і гарачае надвор'е. Аб ахвярах і пацярпелых не паведамляецца.
Між тым у ратавальнікаў, якія змагаюцца з ляснымі пажарамі, невядомыя выкралі абсталяванне на суму 42 тыс. канадскіх долараў ($33,3 тыс.). Першы крадзеж быў зафіксаваны 10 дзён таму. Тады невядомыя знеслі рыштунак коштам 2 тыс. канадскіх долараў ($1,59 тыс.). На мінулым тыдні пажарныя заявілі ў паліцыю аб знікненні з іх трэйлераў абсталявання на 40 тыс. канадскіх долараў (больш за $31,7 тыс.). У прыватнасці, зладзеі выкралі помпы, бензапілы і генератары.-0-
