17 снежня, Мінск /Кар. БЕЛТА/. Сама меней 28 чалавек пацярпелі ў выніку пажару, які адбыўся ў пятніцу ў японскім горадзе Осака, паведамляе ТАСС са спасылкай на агенцтва Kyodo.
З пацярпелых 27 чалавек знаходзяцца ў стане спынення сэрца і лёгкіх - так у Японіі паведамляюць аб тых, у каго смерць пакуль не ўстаноўлена ўпаўнаважаным урачом па асаблівай працэдуры.
Паведамляецца, што ўзгаранне адбылося на 4-м паверсе аднаго з офісных будынкаў у ажыўленым квартале недалёка ад галоўнага чыгуначнага вакзала горада. У будынку знаходзяцца клініка, салон прыгажосці, школа англійскай мовы і некалькі офісаў.
Паліцыя падазрае, што прычынай пажару мог стаць падпал. Як мяркуецца, наведвальнікі і персанал клінікі аказаліся заблакіраваны і не змаглі выбрацца.
Адразу пасля ўзгарання на месца здарэння прыбылі больш за 30 пажарных разлікаў. На працягу паўгадзіны яны патушылі агонь.-0-
